u/Moruskii

فصل : فلسفة الاتكال والانهيار البطيء .

هذي الصورة من أمام مصرف الجمهورية "صـبـراتـه"

في البداية يمكن يترجمها البعض على أنها «مأساة شعب مظلوم» أو «نتيجة فساد حكومي» الخ ... لكن الحقيقة هي العكس تمامًا.

هذي الصورة نتيجة عقلية التخلف والجهل حتى مع وجود بدائل واضحة زي «الدفع الإلكتروني» والخدمات الحديثة.

هذي الصورة نتيجة عقلية شعب يبي المرتب قبل العمل، والراحة قبل الإنتاج، ويبي من الدولة أن تصرف عليه إلى الأبد، بدون أن يبني أو يطور أو يضيف شيء

سنوات والناس تستنى «التعيين الحكومي» وكأنه حق مقدس، لا كوظيفة مرتبطة بالكفاءة أو الإنتاج.

شعب كامل يبي يعيش من خزينة الدولة… لكن السؤال الحقيقي:

من يصنع هذه الثروة أصلًا؟

مافيش اي دولة يمكن أن تنهض أو تتطور بعقلية تقول:

«الدولة توظفنا، الدولة تصرف علينا، الدولة تحل لنا كل شيء»،

بينما المجتمع نفسه مايبيش العمل الحقيقي.

الكل يبو مكاتب، ومكيفات، ومرتبات مضمونه، وأقل جهد ممكن.

مافيش حد يبي مصنع، أو ورشة، أو مشروع، أو مخاطرة، أو إنتاجيه فعليه…

بعدها يبدأ البكاء والشكوى من “العمالة الأجنبية” لأنها أخذت الأعمال التي يرفض هو انه يشتغل فيها.

هذي الطوابير مش فقط نتيجة فساد حكومي.

سببها الأول والرئيسي شعب تعود أن يستهلك أكثر مما ينتج، وينتظر الحل دائمًا من فوق.

والحقيقة اللي لازم نتقبلها:

الدولة مش اب يصرف على شعبه للأبد.

وأي شعب يقدس المرتب السهل، ويهرب من العمل الحقيقي…

حـ يقعد واقف في طوابير لا تنتهي.

STOP.

مع الاسف يعني فكرة الامر بالمعروف و النهي عن المنكر في ليبيا مشوهه بشكل مرعب بدي مجرد عنوان لي اخطر نوع من انواع القمع و السيطره الجماعيه و الفكريه لي عرفتها البشريه خلونا نكونو واقعين في وقتنا هذا معاش صارت دعوة للاخلاق بلعكس صارت ترخيص لكل جاهل متعصب يبي يدخل في حياة الاخرين يحاسبهم و يؤذيهم و يقولك هذا الدين(لا يقلبي هذا انت مش الدين) موضوع الامر بالمعروف في مجتمعنا مش موضوع ثابت يعني على حسب مثلا لو كان ذكر او انثى صاحب الذنب او ملتحي او لا الخ تبي نثبتلكم.؟ نطلعو للشارع 10 دقايق بزبط ونشوفو قداش واحد يسب و يقذف و يكفر و قداش واحد لابس فوق الركبه و قداش واحد مشغل اغاني وقداش واحد يدخن، تبي نزيدك؟ بعد رمضان تعال شوف قداش واحد يجاهر ب الـ.ـزنـ.ـئ تبي نزيدك ؟ قداش واحد يلود ب مصفحه ف الشارع قداش واحد مليشياوي قداش قداش ... المهم شفت هذم كلهم ؟ جيبلي واحد بس واااحد يوقف عليهم ولا يؤمرهم بالمعروف ترا مافيشش مع الاسف (الا قله وفقهم الله ثابتين على مبدئهم) وحتى ولو اول كلمه تسمعها (راجل مايعيبه شي) لكن ترا شوف مرا طالعه تشكي من مضايقات لي تصيرلها ف الشارع حتى بكامل حشمتها شوف التعليقات شن بتقول ترا بنت طالعه بلا حجاب شوف القذف و السب و الثوره لي بتصير ع خاطرها بحجة الامر ب المعروف

STOP الخلاصه الامر بالمعروف يكون بالين و الحكمه و الاسلوب الحسن مش بتجبر و التناقض و السب و القذف قال تعالى: ﴿ادْعُ إِلَىٰ سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ﴾

عنوان الدرس : الغايه لا تبرر الوسيله

المده الماضيه كلنااا شفنا مقطع المدرسه الدوليه وشفنا كمية الهجوم لي صار عليهم و السب و القذف وصارت قضية رأي عام مع إن المقطع مكانش فيه اي شي غلط حرفياا لكن ماعلينااااا

الاسبوع هذا تاني مقطع ينتشر على موضوع تهريب الافارقه في وسط العائلات

هل في من تكلم ؟ لا، هل في من نزل قرار ؟ لا، هل في من طلع هوا و دفالته و تكلم ؟لا، هل صارت نصف ضجة المدرسه؟ لا ، توا اني هذا كله مش هامني تمام

ننصدم تواااا بأنه شخص منزل منشور طويل عريض يبرر ف الشي لي مدايرينه لاااا المشكله وين ينتقد ف الامن على موضوع نشر الفيديو و عاطي الف عذر للبغل لي يسوق ومرته وماشفتش حد قال عليهم ديـ.ـوث و لا انتقده ولا شي سبحان الله في بغل كان مقايل (اليوم تركضلي وغدوا ترقدلي) مشفتاش تكلم

هل يمكن انه الشعب ماشافش الفيديو لي توا ؟ او انه اللحيه و العبايه تعطيك حصانه 😉🤭 ؟

.STOP

المظهر يبرر الوسيله

خلاص توّا المفروض الناس تقتنع إن مشكلة ليبيا معاش مجرد نقص وظائف… المشكلة بدت في عقلية المواطن نفسه. الشاب الليبي تربّى على فكرة إن الدولة ملزومة تصرف عليه، تعلمه، توظفه، وتعطيه مرتب حتى لو ما ينتجش في أي شي حرفيًا. وصلنا لمرحلة إن أي عمل حر، حرفة، مشروع صغير، أو حتى خدمة بسيطة، يشوفوها عيب وما تليقش “بمكانته”. والمصيبة الأكبر إن حتى اللي يحاول يخدم على روحه ويتعب باش يطور من نفسه، المجتمع نفسه ينزل فيه استهزاء وتحطيم لين يرجعه نفس عقلية القطيع. وبعدين تلقاهم يتبكّوا لما يشوفوا أجنبي ولا أفريقي وعنده سيارة ومشروع وحياته ماشية. طبيعي بيتطور… لأنه يخدم وينتج، مش قاعد يستنى مرتب آخر الشهر وهو ما يدير في شي. إحنا قاعدين نصرفوا مليارات على شعب أغلبه مستهلك أكثر منه منتج: علاج ببلاش، بنزين ببلاش، دعم ببلاش، ورواتب حتى لناس ما تشتغلش فعليًا… وفوق هكي التذمر والسب والشكوى ما يوقفوش. المشكلة الحقيقية مش بطالة الوظائف… المشكلة بطالة العقل. لأن أخطر شعب مش الشعب الفقير…

أخطر شعب هو الشعب اللي تعود يستهلك كل شي بدون ما ينتج أي شي.

سيكولوجية الوهم الجماعي

أغبى أغبى حاجة يديرها المجتمع… إنه يكذب على نفسه وبعدها يمشي يصدق الكذبة هذي بكل ثقة

بصدق المجتمع الليبي واصل لمرحلة متقدمة جدًا من التناقض المقرف

ناس عايشة دور الشرف والكرامة والمقاومة والتعصب والثورية لكن أول ما تجي لحظة الفعل الحقيقي أو أول ما تختفي الكاميرا يرجع كل واحد لطبيعته ويرجع يدير في نفس الحاجات اللي كان يسب فيها قبل شوي

وعندهم فلسفة عبقرية جدًا إن مجرد عدم نطقهم لكلمة (إسرائيل) يعتبر إنجاز تاريخي وخلاص القضية اتحلت وتم تحرير فلسطين

أما لو أنت نطقت الاسم؟ خلاص انتهى أمرك عميل كافر صهيوني خائن وناقص يقولولك عميل مزدوج للموساد وCIA

المجـ.ـاهد: قول مسطرة 😒😤

نـتنـ.ـياهو: مسطرة 😳

المجـ.ـاهد: أبناء غـ.ـزة عملوكم مسخرة 😎💪🏿🔥

نـتنـ.ـياهو:أخخخخ جننتوني يا أبناء غـ.ـزة 🥺😩😡

يا أخي شن كمية العبط هذي؟

شن الفايدة من شعارات وهمية وتعصب وسب وعياط وكلمات مكررة وتصاميم تيك توك عليها موسيقى حماسية وااا و ايموجيز نار؟

شن استفدنا غير جرعات دوبامين و وهم جماعي وتخدير للعقول؟

المشكلة إن فيه ناس مقتنعة فعلًا إن (قصف الجبهات) بالتعليقات والمنشورات يعتبر نضال حقيقي

تحسهم داخلين حرب عالمية من تعليقات الفيس والتيك توك بينما الواقع لا تغير فيه شيء ولا حتى 1%

الحل عمره ما كان بالكلام ولا بالصراخ ولا الكلمات ولا بالاوهام الوطنية الفارغة

الحل بالفعل بالوعي بالعقل بالتغيير الحقيقي… مش بجو (احنا خير أمة) وبعدها المجتمع غارق في الجهل والفوضى والنفاق والانهيار من كل الجهات

#ملاحظة

كل الكلام هذا من واقع ليبي بحت

لا عندي منظمة خارجية لا أجندة لا تمويل ولا حد دافعلي

وأصلاً ليبيا نفسها توا يادووب تعتبر دولة

عبارة عن شارع مفتوح لا قانون لا نظام وكل واحد فاتح على روحه محل تنظير وثورية من التلفون

لكن طبعًا بدل ما نراجعوا أنفسنا الأسهل إن أي واحد ينتقد الواقع يتهموه بالخيانة

لأن المجتمع اللي يكذب على نفسه… يخاف من أي حد يقول الحقيقة

...بين القطيع والفرد: صراع الهوية في المجتمع..

في مجتمعنا الليبي الحبيب 🤭😇

في عندنا شي اسمه (عـقـدة الـنـقـص أو الاخـتِـلاف) و الموضوع هذا مش جديد لاااا متوارث من زمااانن ولاحظت انه في قاعدة ثابته عندهم

ناجح او (مـخـتـلـف) = مش راجل

وانتم لاحظو بس من الصغر الموضوع هذا لاحظو انه اي طالب يقرا في مدرسه خاصه لازم تركب عليه صفة الدلع و عدم الرجوله الخ

او شوف مرأة لابسه مثلا نظاره شمسيه في حراراة 60⁰ و تسوق في سيارة كويسه بصفه عامه امرأه مختلفه عن القطيع معاش نبي نكمل بعد هذي النقطه لنه كلنااااا كلناا نعرفو شن راح ينقال عليها من كلام و سب و قذف الخ

او دكتور ناجح في شغله وفاهم الطب و يكون فرفوش شوي و شوف تعليقاته بس شوف التعلقات عليه

الموضوع اطول من هكي لكن ماعنديش خلوق نكمل نكتب

ان شاء الله ننفهم صح بس

....لماذا نخاف من علاقة يفترض أن تكون الأكثر أمانًا؟

.

في كثير من البيوت الليبية العلاقة بين الأخ وأخته لا تُبنى فقط على الاحترام بل على نوع من الرقابة الصامتة المستمرة داخل نفس المنزل

الأخت تُطلب منها أن تراقب تصرفاتها داخل بيتها وطريقة لبسها وطريقة جلوسها وكأن وجود الأخ داخل نفس المكان يفرض حالة دائمة من الحذر

والأخ في المقابل يُمنح دور غير معلن داخل الأسرة وكأن عليه أن يكون “حارس الحدود” الذي يراقب ويعلّق ويغضب إذا تجاوزت الأمور ما يعتبره مقبولًا

السؤال هنا ليس بسيطًا كيف وصلنا إلى هذه النقطة داخل أكثر علاقة يُفترض أنها طبيعية وآمنة في الحياة الإنسانية وهي علاقة الإخوة داخل بيت واحد

الفكرة المنتشرة في بعض الخطابات الاجتماعية والدينية غير المباشرة هي أن وجود الرجل والمرأة داخل نفس البيئة حتى داخل الأسرة يحتاج دائمًا إلى ضبط شديد وكأن هناك احتمال دائم لحدوث “انحراف” إذا غابت الرقابة

هذه الفكرة تتحول تدريجيًا إلى سلوك يومي داخل البيت فيصبح الأخ والأخت يتعاملان مع بعضهما ليس كأقرب الناس بل كأن هناك مسافة نفسية غير مرئية يجب الحفاظ عليها طوال الوقت

لكن المشكلة هنا ليست في الحدود بحد ذاتها بل في المبالغة في خلق حالة خوف داخل علاقة يفترض أنها قائمة على الأمان الفطري

عندما يُربّى الفرد على أن أي حرية داخل البيت تحتاج مراقبة فإن البيت نفسه يتحول من مساحة راحة إلى مساحة توتر دائم وكل تصرف بسيط يصبح قابل للتفسير أو الحساسية

هذا النوع من التربية لا ينتج احترامًا صحيًا بل ينتج علاقة مشحونة داخل الأسرة فيها كل طرف يشعر أنه مراقَب أو مُراقِب بدل أن يكون مطمئنًا بطبيعته داخل بيته

المشكلة الأخطر أن هذا الأسلوب لا يعالج الأخلاق بل يخلق توترًا داخليًا مستمرًا ويجعل العلاقة الأسرية نفسها غير مريحة وكأن الإنسان يحتاج أن “يحسب حساب” أقرب الناس له

بينما في جوهر العلاقات الأسرية الصحية المفترض أن يكون البيت هو المكان الوحيد الذي يسقط فيه هذا النوع من الحسابات ويُستبدل فيه الخوف الطبيعي بالأمان والثقة والرقابة المستمرة بالفهم والاحترام

وفي النهاية يبقى السؤال الحقيقي هل نحن نربي داخل بيوتنا أفرادًا يفهمون الحدود بشكل ناضج ومتوازن أم نزرع داخلهم شكًا دائمًا حتى في أكثر العلاقات أمانًا في حياتهم

لأن الفرق بين الاثنين لا يحدد فقط شكل العلاقة بين الأخ وأخته بل يحدد شكل البيت كله وهل هو مصدر أمان أم مصدر توتر دائم

السؤال هذا ديمااا يجي في بالي ومتعبني حقيقتاً لي انه يدخل في حياتنا اليوميه الا وهوا هـل الـعـدل حـقـيـقـي ؟او انه بس فكره قاعدين نحاولو نقنعو انفسنا بيها.. لنه لاحظ

لما ينولد الانسان مايختارش مكانه ولا ظروفه المعيشيه ولا بيئته الخ

بحيث انه في من ينولد في بيئه مستقره بعيده كل البعد عن المشاكل في دوله مستقره تضمن له التعليم و الرعاية الصحيه وفي مجتمع يدعمه و مليئ بفرص العمل

على عكس الشخص الاخر اللي ينولد في بيئه ومجتمع سام يقتل طموحه و احلامه قبل ان يكبر و يصير عباره عن كومه من الاضطرابات و الامراض النفسيه و العقد وحتى ابسط و اساسياته الحياتيه غير متوفره له لا تعليم جيد ولا رعاية صحيه و دوله متهالكه من الصراعات و ضعف مقوماتها مثل ليبيا حتى المناخ فيها و جوده الهواء من الاسوء على مستوى العالم

بعد هذا كله كيف يمكن ان تقنعني انه الحياة متساويه و عادله؟

بحيث انه فقط كونك من بقعه جغرافيه معينه حرفيا خرابيش على الورق يمكن ان يعطي عنك انطباع او فكره اوليه بالسوء او بالحسن

في الاخير العدل لو نظرنا له من جميع زواياه راح يقعد ناقص و غير مكتمل بمثال شخصان بنفس الـ IQ ونفس الدرجه التعليميه ونفس التخصص الفرق الوحيد انه واحد من ليبيا و الاخر من المملكه المتحده .. بدون ما نكمل الفكره وضحة انه لي من UK راح يكون سابق الليبي على الاقل ب 10 سنوات.