ليه بنتجوز ؟
سؤال قعدت أفكر فيه وانا سايق...
هو إيه الهدف من الجواز في مصر في الوضع ده؟
ليه أنا كشاب في بداية حياتي وبطور من نفسي عشان أوصل لأفضل حاجة عندي وأعيش حياة كويسة وأبقى مرتاح أول حاجة بفكر فيها هي الجواز؟
لو جيت بصيت لمتطلبات الجواز اللي بقت غير منطقية في أوقات كتير وفي المقابل بقيت شايف إن الثقة في اخلاق البنات نفسها بقت أصعب من زمان، هتلاقي إن المعادلة كلها محتاجة وقفة..أنت بتقضي سنين من عمرك بتتعب وتشتغل وتبني نفسك.. وفي الآخر مطلوب منك تحط حصيلة السنين دي كلها في قرار مصيري انت مش ضامنه
فبقيت بسأل نفسي.. أنا المفروض أكون بدور على الجواز ليه أصلًا؟
هل عشان المجتمع شايف إن ده المسار الطبيعي للحياة؟ ولا عشان الإنسان فعلًا محتاج شريك يشاركه حياته؟ ولا عشان فكرة تكوين أسرة وإن يبقى فيه حد جنبك وقت الشدة قبل الفرح؟
لأن لو بصيت للموضوع من زاوية مادية بحتة...هتلاقي إنك ممكن تعيش لوحدك بمستوى أحسن وضغوط أقل ومسؤوليات أقل .. ولو بصيت من زاوية راحة البال هتلاقي ناس كتير متجوزة ومش مرتاحة أصلًا
فإيه الحاجة الحقيقية اللي بتخلي إنسان عاقل يدخل التجربة دي؟
يمكن المشكلة مش في الجواز نفسه..يمكن المشكلة إن صورة الجواز اللي بقينا شايفينها حوالينا بقت مليانة مشاكل وصراعات وتوقعات غير واقعية من الطرفين.. وده واضح جدًا في تجارب كتير مع بعض البنات اللي الواحد بيقابلهم.. لأن في حالات كتير بيطلع منهم نكد ومشاكل أكتر من أي حاجة تانية وأنا هنا بتكلم عن بعض التجارب اللي شفتها بنفسي..مش عن كل البنات
أنا مش ضد الجواز..لكن فعلًا بقيت محتاج أفهم إيه الميزة الجوهرية اللي تخلي شخص يغامر بسنين عمره ومجهوده وفلوسه في حاجة نسبة نجاحها حواليه مش مطمنة؟
وهل فعلًا الجواز الناجح لسه موجود وبكثرة..ولا إحنا بقينا بنسمع عن الحالات الاستثنائية أكتر من القاعدة نفسها؟