u/BatSelect486

السلام عليكم

جمعة مباركة

انا صيدلي موظف من ٥ سنوات في شركة خاصة و لله الحمد ، بديت في 2021 و اول مادخلت الشركة كل الشركة اجانب ماعدى السعوديين الجديدين مثلي بعد قرار السعودة لشركات الادوية.

الشي اللي لفت انتباهي شغلتين ، اول شي الاجانب عندهم حميّا بين بعض ، يفزعون لبعض و يوظفون بعض و يسلكون لبعض لوبيات لوبيات مو اي كلام بين الشركات نفسها لدرجة الاجنبي ينفصل عشان مشكلة Compliance و هذا خط احمر و سمعة زبالة مره مره فجأة يتوظف بمسمى احسن و شركة احس بعد 😂

عكس اللي شفته من السعوديين و انا كنت منهم منهم اي غلط يصير بالشغل تلقى الواحد خايف و مترقب و كأنه يوم القيامة و الاجنبي مافرق معه.

الشغله الثانية ان حنا اول مانبدأ الشغل تلقى الواحد يشتغل على اللي يقوله الكتاب والقوانين بدون لف ودوران ، كأنك روبوت لان الواحد ماتوظف الا وروحه طالعه و مستحيل يسوي شي غلط عشان وظيفته ماتروح ، عكس الاجنبي.

اذكر جيل بداية السعودة 2019-2021 في الصيدلة كنا بسيطين و طموحين مره ، و نشوف المدير الخبير هذا يبي لنا الخير صدق! نشوفه يضحك معنا نتوقع اننا بنترقى بعد سنة بس الواقع ؟ فيه قرار سعودة ؟ حبيبي نزلي تغيير مسمى الحين و يلا استقدم اجنبي. طيب هذا المسمى مفروض انه مكاني ليش تجيب اجنبي ؟ لان الاجنبي يقدر يلف ويدور و يسلك و السعودي ينخاف منه ، ليش ينخاف منه ؟ لان ٩٠٪؜ من شغلهم قائم على اللف والدوران و يدرون لو مسك السعودي بيفضح ابو شغلهم من فوق لتحت.

الشغله اللي مستفزتني باخر سنة هي هبه سعودة و ترقيه السعوديين للادارات و خصوصاً بالشركات الاجنبية لان الشركات السعودية زبالين مايرقون الا اجنبي ، هي انهم يرقون الاقل كفاءه و هذا الشي واضح جداً و اكيد فيه استثناءات طبعاً ، ليش يرقون الاقل كفاءه ؟ عشان اقدر انا كمدير اتحكم فيك و اكون متفضل عليك و عشان أبين للاداره الGlobal انو هاه شوفوا كلهم زبالة محد يعرف يشتغل. ياعيال شي يقهر كمية كفاءات للاسف جالسه تضيع بسبه هذا الشي.

طيب عشان ما اطول ، ليش قلت حنا محتاجين هذا الوعي الاجتماعي اللي صاير الحين ضد الشركات و توظيف الاجانب لأن كانوا يقنعوننا و حنا مصدقين ان المشكلة فينا! و الواحد يحرق دمه عشان يتوظف ولا يترقى و يدوام ١٤ ساعة يحسب ان المشكلة فيه ، اللي صاير الحين و لله الحمد ان فيه نخبة من السعوديين اللي ترقوا او توظفوا مقتنعين ان المشكلة في الاجانب مو فيهم و بدأوا يكونون لوبيات سعوديين مع بعض و يساعدون و يرقون و يفزعون و يسلكون لبعض! مو زي اول نحسب ان البيئة نظيفة و ع قد ماتشتغل ع قد ماتكسب ، بدينا نتعلم الوساخة شوي او خلونا نسميه ذكاء بالتعامل 🤷🏻‍♂️.

ف Go ahead ، الغلط مو فيك بس هذا مايعني انك دايم صح ، طور من نفسك و خذ تجارب و ادخل اي مقابلة او اسسمنت و انت مروق.