r/Tjarb_al3rb

مدري اذا الزيت المنقوع بالثوم هو التسمية الصحيحة لكن على العموم في فترة من حياتي كنت حطيت افصاص ثوم كثيرة بقنينة زيت زيتون صغيرة يمكن نص لتر او اقل و خليتها تنقع لمدة حوالي 30 يوم او 20 مذكر بالزبط

بعد مرور العشرين يوم كنت كل صباح اتناول ملعقة من هذا الزيت بعد الفجر على الريق ثم اعود للنوم و استمريت على هذا الحال لمدة

لماذا ؟ لانيي مدري وين سمعت ان ذا مفيد لصحتك وجسمك مدري شلون

بعد مرور مدة تعبت لان طعم زيت الزيتون وحدة لا يطاق فما بالك ب زيت الزيتون مع الثوم

وأصبحت استعمل ذلك الزيت في الطبخ

هل كانت هناك فائدة ؟

والله مدري الصدق ما حسيت باي فرق في جسمي او صحتي وما ظني رح اعيد ذا الفعل مجددا

سبب المنشور هو منشور تجربة تبخير الفم امس

وهل تنصح فيها؟

اكلت بروست وثوم، فمي صار ناشف وازعجني، فرشت اسناني شربت مويه شربت عصير سويت كل شيء ولا زال فيه شعور مزعج، قلت اوه اكيد ان ذا من الريحه ف ولعت فحمه حطيت بخور وحاولت اشفط الدخان بفمي، حرفيا حرفيا انخنقنت وقعدت اكحكح والطعم كان سييييييء ونشفاااان، مدري ايش كنت متوقع غير كذا ولا الاسوء صار ازعاج من الثوم واحتقان بالحلق. اكلت اسكريم فراوله وخلاص راحت.

نصيحه اليوم: لا تجرب ابدا تستنشق بخور عشان تشيل ريحه الثوم من فمك

اكتشفت اني ما احب الوقت من 7 الصباح لين الساعه 5 المغرب،، وقت غثيث ودي احذفه من اليوم

واعرف فيه ناس غريبه عجيبه راح تقول انها تحب هالوقت

في بداية السكن لوحدي كنت ضايع؛ ما أعرف أغسل ملابس ولا عندي إدارة مالية ولا أعرف أطبخ ولا أذاكر. حتى أول طبخة لي أذكرها كانت صدور دجاج كبار ما قطعتهم، حطيت عليها زيت زيتون وبهارات سيئة من البقالة، وطلعت من بره محمرة وشكلها لذيذ بس من داخل نية ما استوت.

كان السكن لوحدي صعب لان كنت كل إجازة اطلع الديره لاهلي لان ما عندهم غيري يخدمهم والديرة يبعد عني ساعتين. طبعاً خلال السنوات ذي تعلمت بنفسي كيف انام مبكر وكيف أصحى للمحاضرات وكيف اهتمّ بنفسي لان ما كان فيه ضغط: روح نام! روح ذاكر! قم داوم! كنت مرتاح وعايش لوحدي، وبدأت أسوي رياضه ودايت وسجلت بنادي.

شخصيتي بدأت تكون أفضل بالذات لما أتعامل مع بائعين، زمان كنت استحي منهم وأشتري بدون ما أشوف السعر وبدون مكاسره لان الوالده كانت دايما تجي معي وهي اللي تكاسر وتتكلم وانا ساكت، الآن الحمدلله صرت اخش في عيونهم وأعد الفلوس قدامهم (من حقك ما بيقولون شيء). وبرضو لما واحد يطالعني احط عيني بعينه لين يشيل عينه (إلا إذا كانت بنت أغض البصر)، شيء غريب بديت أسويه عشان اكسر الخجل بس مع الوقت تعودت وصار شيء رهيب، احط عيني بعيون الناس. وما كنت اعرف كيف أتكلم او أتعامل مع العمال لان امي هي اللي تكلمهم وتهاوشهم وتكاسرهم وانا بس واقف معها وساكت. امي الله يحفظها كانت تسوي كل شيء بنفسها ونيتها طيبه ما كانت تبغاني أنا واخواني نتعب، بس من جهه هي ما تدري انها جالسه تربي إنسان اتكالي ولا يُعتمد عليه وهذا الشيء لاحظته لما سكنت لوحدي.
وصرت جريئ وأتكلم مع الناس بدون خجل وأسأل أسئلة ظاهرها لقافة وبجاحة بس انها أسئلة عادية عشان أفتح حوارات وأخلي الواحد يتكلم ويطلع اللي بقلبه زي ما أنا أحب واحد يسألني ويخليني أطلع اللي بقلبي.

بعد مرور أربع سنوات لوحدي تغيرت للأفضل الحمدلله وصارت الوالده تعتمد علي، وحتى معد صرت اطلع لهم الديره لان امي تزوجت، ومرات تجيني مع اخواني هنا تجلس بالإجازة. منذ سنة تقريباً بديت احس بالوحشة في كل مره يزوروني اهلي ويرجعون وقت الإجازة، وأكسر الوحشة بالذهاب للنادي حيث الزحمة والحيوية او أروح الفندق أتعامل مع الناس. اكتفيت من العزلة وصرت أحب الجمعات اكثر واروح أقابل جدي وجدتي وخالاتي ببيوتهم إذا رجعت الديرة وأنشب لهم واقعد اسولف معهم وهم ينبسطون بوجودي فديتهم، واشتغل بفندق شغل بدون راتب عشان اكسب خبره وعشان اهرب من الوحده وأواجه الناس وأتعامل معهم وأحس بالحياة وقيمة الناس اكثر.

وفيه موقف صارت قبل فتره بالفندق، جاء أب حجز غرفتين وصالة وبعدها راح جاب ولده وبنته، البنت حول يمكن ٨ والولد حول ٤ وأنا طلبت من الأب يوقع على ورقة، وبنته قالت بابا ابغى أوقع، وخلاها توقع، ولاحظت ولده كان طافي وفيه نوم ساكت وما يقول حاجه، بعد ما وقعت البنت خذيت القلم وأعطيته الولد قلت له ضروري نحتاج توقيعك يا بطل، وهو مستحي يقول ما اعرف أوقع، قلت له عادي مو لازم تعرف، وشخبط على الورقة ومدحتهم الاثنين، البنت كانت حيوية بس الولد لما سمعني أمدحه انبسط.

وفيه موقف بسيط حاب أذكره لاني اعرف ان زمان مستحيل اسوي كذا: أنا مرة طلعت من الشقة وفجأة ألقى عامل بنقالي جالس قدام العمارة، ولما شفته سلمت عليه ورحت ركبت السيارة، وجاء عندي قال يبغى يروح مكان وقلت له اركب، سألني إذا أنا بروح نفس المكان اللي هو يبغاه قلت له لا بس عشانك بوديك هناك، وجلسنا نسولف وعرفت منه ان جاري كفيله ويشتغل عنده وخذيت رقمه يمكن أحتاجه بعدين. وقلت له هاه إذا جيت بعدين ودقيت عليك واحتجت منك خدمه تساعدني وتراعيني وقال ابشر من عيوني. وطلبني أوقف عند صرافة وسحبت له فلوس وكان آخر خمسين ريال في حسابه، سحبت له أنا وعطيته الصرافه وحطيت الخمسين في جيبي وانا ساكت وهو يشوف ومشيت وهو ساكت ما يقول حاجه وحتى ما أعطاني ردة فعل وحسيت ان مزحي ثقيل شوي وطلعت الخمسين ورجعتها له وقال انت فكّر أنا خوف؟ لا لا، قلت إلا إلا انتا خوف كبير، قال لا مافي خوف إذا انت سوي مشكلة أنا كلام كفيل، قلت له ادري عشان كذا أنا مؤدب معك لان اي مشكلة معك انت بتروح تفضحني عند جاري.

قبل شوي جننتني وحده لدرجة اسمع صوت الزن ((من ورا السماعه))
ف قررت اقعد هاديه
شغلت كل الانوار ، قفلت الباب
وقررت اضحي واخليها تقرصني ( دايم اذا قرصت احد تجي تتكي حواليه، ع جدار اي شي حوله)
المهم تحملت خمس دقايق ولفيت بهدوء وقتلتها
جربوو التكنيك ناجح جدًا 😎

قبل فتره شجعوني اصحابي اصبغ شعري وانا مؤخرا صرت اسوي اي شي بدون تفكير لاني ممل

جلست اجرب ايام وايام واقص خصلات من شعري وجربت الوان كثير مره لين ثبت على لون واحد وصبغت وطلع افقع لون بالغلط

وقتها مره خفت بس تحمست اطلع للناس بس مدح اصحابي شجعوني، يوم شافوني الناس مره سوو😱😱😱

اكتسبت شهره والله والحين مستحيل اخلي لون شعري بني ولو اني ستيل اكره جذب الانتباه

أنا كنت أعاني من النوم الملخبط والعشوائي بس قدرت أضبطه تدرون كيف؟

طبعاً ما يحتاج أقولكم عن الساعة البيولوجية، أنا جربت لما أضبط نومي في وقت محدد جسمي يطفي مهما كان الوقت.

وكنت أسأل نفسي ليش لما يجي الليل ما يجيني نوم زي لما يجيني بالنهار؟ واكتشفت إن فيه عوامل كانت تخرب علي مثل الجوال ونومي في نصف النهار، واكتشفت إن فيه شيء اسمه "ضغط النوم" (sleep drive)؛ يعني لما أصحى الصباح وفيني خمول وتعب أقوم وما ارجع انام، ويختفي التعب والخمول ولما يجي الليل يرجع مره ثانيه، أول ما انسدح بالفراش انام علطول بدون ما احس بنعاس.
وصرت أقاوم شعور إني أرجع أنام الصباح عشان يثبت هالنظام، ولاحظت إنها ما تضبط من أول ليلة، احتجت ثلاث أيام أو أربع عشان تثبت ساعتي البيولوجية بالوقت اللي أنا أبغاه، وبعدها بدأت ألاحظ إذا جاء موعد نومي الساعة ١٠
أو ١١ أطفي على طول وأنام.

ولاحظت بعد إني لما أمسك الجوال بالفراش في وقت النوم ما فيني نوم، بس إذا رحت الفراش بدون جوال أنام على طول، والغريب إنه ما يجيني إحساس النعاس، فقط بمجرد ما أنسدح أنام على طول.

بحكم انه الكل تكلم عن المشي، انا بذكر تجربتي

عندي عادة او هواية غريبه، في يوم عشوائي بالاسبوع امشي فيه اكثر من 10 كيلو لوجهة عشوائية استكشف فيه الخريطة اكثر وازور الوجهات المثيرة للاهتمام

وجهتي اليوم كانت لمحل بوبا اسمه gong cha يبعد عني ساعة وربع مشي او 5 كيلو. انا مؤسس للحزب الكاره البوبا، البوبا عبارة عن عيون فيران تسبب السرطان. الهدف من شراء البوبا هو فقط اني اثبت للشخص اللي نصحني بالمحل ان البوبا سيئه.

اخترت يوم الذهاب بعناية، درجة الحرارة تحت 30، الهواء قوي، السماء مغيمه. لبست جزمتي، اخذت سماعه وماء ومشيت. استخدمت السماعة كطوق لشعري عشان لا يزعجني بسبب الهواء، قررت اليوم اني ما اسمع شيء بالسماعه(على الاقل نص الرحله) عشان اتأمل البيئه حولي اكثر، انتبه للاصوات المحيطه اكثر.

كتت اتأمل السماء، بسبب الغيوم والتلوث الضوئي ما قدرت اشوف الا نجم واحد واللي هو pullox أو بالعربي رأس التوأم المؤخر. عادة لما امشي في مدينتي الام احب اتأمل في السماء والنجوم واحيانا اطلع جبال او اروح ضواحي المدينه عشان اشوفها أوضح، لكن للأسف انتقلت للعيش في اسوء مدينه زرتها في حياتي، مدينه ساده بدون تضاريس ومتكدسه سكانيا وصعب الوصول لضواحي المدينة.

المهم كملت المشوار، بدأت اشوف الأبراج والتطور والحداثه، شفت اشهر تجمع ابراج في المدينه من فوق هضبه، من اجمل المناظر اللي شفتها في هذي المدينه. شفت القصور والسيارات الفاخره، شفت تجمع كبير جدا وزحمه ل مغازله؟ ما اعرف اوصف القبح اللي شفته الله لا يبلانا.

كملت ومشيت الى طريق رئيسي، شفت زحمه وعدد كبير من السيارات، المنظر كان مثير للاهتمام، كل شخص هناك كان عنده حياه خاصة فيه قاعد يعيشها كل شخص كان عنده وجهة ما يروح لها، كنت اطالع السيارات، الاسعاف اللي بداخله مريض، العسكري اللي ينظم الحركه، اللي على الجوال، اللي مع عائلته او اصدقائه، الخ... ، معقول كل هذول NPCs؟ اعتقد هذا افضل عالم مفتوح موجود، حتى الNPC عنده حياه واهداف.

كنت حتى اتأمل المحلات والبشر، المقاهي ممتلئة بناس يتابعون مباراة ما، المطاعم الفارهه والاشخاص اللي يدخلون لها، العوائل وتصرفات افرادها، اختلاف المحلات واختلاف انواع الناس وحالاتهم بداخلها.

عموما وبعد ساعه وربع وصلت المحل، طلبت بوبا حليب شاي مع سكر بني وكراميل حجم وسط ب 20 ريال. زي ما توقعت كان مو حلو، اقيمه 3/10، البوبا حسيتها عيون فار، الحليب كان لذيذ عشان كذا اقيمه 3 مو 0.

خلاص قررت ارجع، طلعت فوق كبري وكان فيه حبه بوبا طعمها ما عجبتي ف تفلتها على الشارع من فوق الكبري، قاعد اتخيل انها طاحت ودخلت سيارة واحد وثم صقعت عينه وانفقعت ومن الفجعه والالم فقد السيطره وصدم سيارة ثانيه وهو مسرع ف تشقلبت السياره وثم اللي حوله بدأوا يصدمون وصارت فاجعه كبيرها وماتوا كل الناس وكله بسبب البوبا، البوبا لازم تنتهي من هذا العالم.

وصلت للهضبه او المنطقه القريبه من سكني، الجو اشتد وصارت عاصفه والهواء جدا شديد، بقي نص ساعه على الوصول ،كنت ابغا اجرب سرعتي قررت اجري، رحت شارع فاضي شغلت المؤقت وانطلقت، ركضت تقريبا مسافة 160 متر خلال 40 ثانيه يعني تقريبا اعلى سرعه لي 15كم/ساعه. ثم زي ماهو متوقع استفرغت كل البوبا اللي في بطني، اصلا طعمها مو حلو، معدتي ما تتشرف بالبوبا.

دق علي خويي، شارك معي عدة معلومات، انتهى الاتصال. طوال الطريق كنت افكر باللي قاله، معقوله معلوماتي كانت غلط؟ لكنها منطقيه، صح؟ اكتشفت ان فيه طلاب في جامعتي مو اغبياء، زاد عدد الافراد في المنافسه، اول مره يزيد الرقم من فتره.

بدأت تمطر، الرياح زادت قوتها، المعلومات كانت صادمه، ضيعت سنه اجتماعية لأن معلوماتي خطأ، المسار اللي اتخذته انا ما كان الطريقه الوحيده؟ فيه اكثر من طريق؟ لكن كلنا نعرف انه اللي وصلوا اخذوا نفس هذا المسار، صح؟ صح؟ المسار اللي اتبعه انا خطأ؟ ليش ما قدرت؟ كيف قدر؟

ضعت في دوامة افكاري، قاطعني وصولي للغرفه، شغلت البي سي وخلاص كملت حياتي

المشي لوحدك لسبب عشوائي هو تجربه عظيمه، بالنسبه لي من امتع التجارب اللي بدأت اسويها في سنين حياتي الاخيره، يمكن بدأت اسويها لاني متوحد او لاني فاضي او لان امي وابوي ما يحبوني لكن مو مهم السبب المهم النتيجه، التغيير اللي يحصل لتفكيرك، نظرتك للبشر والعالم من حولك، المحادثات العشوائية اللي تحصل، المتعه من الشيء الممل "المشي"، تحملك للاشياء السيئه مثل الحر والطقس السيء، والاهم من هذا كله انه يساعدني في ترتيب افكاري. هذا كله بالنسبه لي سبب كافي يخليني ارجع امشي دائما

.

مو كرياضة بل وسيلة نقل ، صرت أقضي مشاويري القريبة مشي

التتايج :

١ - إكتشفت ان الجو مو بذاك السوء الغير محتمل

٢ - اكتشفت ان حينا جدًا جميل وفيه كثير محلات ما كنت منتبه لها ، وفيه مناظر طبيعية جميلة جدًا ، وسيارات فارهة ورياضية ومتعددة

٣ - اكتشفت ان بعض المشاوير مشي أفضل من السبارة

فيه نتائج أكثر لكن حسيت ذي المهمة بس

اذا تتقن البكسل ارت او تعلمته شاركني تجربتك لشخص fully beginner من زمان وانا ابي اتعلم عشان اطور لي قيم واتعلم game dev (شي ثاني اتمنى اتعلمه) واخيرا استقويت ابدأ واخطو خطوة التعلم الشي الوحيد الي سويته حتى الأن اني نزلت سوفتوير LibreSprite وفتحت تتوريال والحين قاعدين نطالع انا والشاشة على بعض… ابي اتعلم بسرعه ليش صعب 😞 الي يعرف للبكسل اعطوني تكنيكات ونصايحكم وكيف ما ايأس
ادري التعلم يحتاج وقت بس مشكلتي عجولة ابي اتطور بسرعه << مشكلة بحد ذاتها

دايم يجيني ذا الشعور كذا اكون ابي اتعلم البرمجة، العزف، الاوردينو و الحياكة و غيرها من الاشياء بس اوقات اطنش لان اقول يمكن فترة رغبة بعدها تزول و احسني فارغة
شاركوني تجاربكم

كنت في فترة من الفترات من عمري شديد الإكتئاب و الحزن على نفسي لعدة امور لن ادخل بتفاصيلها. حتى سائت الامور و ارتفع وزني ارتفاع لم اعتقد انني ان ارى ذلك الرقم ابدا.

و بعد عدة محاولات بالرياضة باتت بالفشل قررت ذات يوم ان امشي و لعلي بذلك الوقت كنت امشي و لم ادري عن نفسي لانني كنت مشغولا بالتفكير.

ثم طرحت في نفسي فكرة لماذا لا اخذ المشي كرياضة استفيد منها ان كانت تجربتي لليوم جيدة. و بالفعل بدأت ب٧٠٠٠ خطوة لليوم كامل مع زيادة ٥٠٠ لكل شهر حتى استطعت هذا الاسبوع ان اصل الى ال٢٠ الف خطوة و لله الحمد.

كانت من امتع التجارب فقد استعدت صحتي و لياقتي اللتي فقدتها بالوزن و تحسن عقلي و حالته الصحية.

فلذلك انصح جدا بالمشي للجميع