فقرة الأسبوعية للمصادر " العودة " | العمل الحر على الانترنت كبداية
السلام عليكم لكل الهاديين والهاديات في هذا المجتمع اللطيف
long
time no sources
منشور طويل حبتين استحملو شوي
بنعطيكم شوي من خبرتي المتواضعة من سنوات بحثي
وتجاربي مع منصات العمل الحر ع النت
في الفترة الأخيرة لاحظت إن هلبا (كثير) ناس بدت
تهتم بالعمل الحر خصوصا لمهتمين ومهتمات بمجال هذا وعندهم مهارات يبو يستثمروها
بنحكي ع اول منصتين (عربي) تعرفتهم عليهم في 2017 تقريباً
( في الاكيد فيكم اللي يعرفهم ومرات جربهم ونتمنى ان يشاركونا تجربتهم في
تعليقات )
(خمسات \ مستقل)
المنصتين يعتبروا من أفضل الخيارات لأي شخص يبي
يبدأ يشتغل بمهارته من النت بدون رأس مال كبير (مفيش ميزانية اطلاقاً) أو خبرة طويلة بالبداية
الفكرة هي إنك تقدم خدمة تتقنها، والعميل يطلبها منك مقابل
مبلغ معين. ممكن تكون الخدمة كتابة، تصميم، ترجمة، مونتاج، تفريغ ملفات ، تعليق
صوتي، أو أي مهارة تقدر تقدم فيها قيمة للناس.
اللي عنده في الرسم, في كتابة قصص او ادبيات, شرح مواد ، إقتراح اسماء لشركات او برندات أو اي شي يخطر ع بالك
شن الفرق بين خمسات ومستقل
خمسات مناسب هلبا للمبتدئين والخدمات السريعة، لأنك تعرض خدمة جاهزة والعميل يشريها طول بعد اتفاق لذلك هلبا ناس تبدأ منه لأنه أسهل نسبيًا في الفهم والتعامل.
ملاحظة: في خمسات موقع عربي فكرة منه اي خدمة تبدا بخمسة دولار لعدد معين, لكمية معينة, صفحات , كلمات والخ فا هذا علاش سموه خمسات
وحاجة تانية انك تمشي للعروض ( طلباتهم ) وتجي تعلق بخدمة متعك شن المفروض بديره مقابل كم . بتلقى عدد من ناس يعلقو نفس الشي ولازم تكتب باللغة العربية مش لهجتك وتكون عندك خدمة اللي بتقدمه في بروفايلك واتية باش يقدر العميل يدخل ويحجز ويتواصل معك عن طريقها ويمنع تواصل خارج (نصيحة مني جربت وندمت )
أما منصة مستقل مناسب أكثر للمشاريع الأكبر والتعاملات اللي تحتاج تفاصيل وعروض قوية.
نفس الشي في خمسات بس بنسبة فرق بسيطة من ناحية التسعير مرات تبدا الخدمة من 100 دولار ل 500 دولار لان بيكون مشروع كامل ومنافسة عالية شوي فا تبدا تحط عرضك
( الحق ماجربتاشي بطريقة كاملة برغم من نفس الشركة )
من الحاجات الحلوة في العمل الحر إنك تقدر تبدا حتى بإمكانيات بسيطة ومن مكانك، ومع الوقت مهاراتك تتطور من كترة الشغل والتعامل مع ناس ومشاريع مختلفة، وحتى عندك حرية أكثر في الوقت والشغل( يعتمد على نوع الخدمة اللي تقدم فيها)
لكن في نفس الوقت الموضوع شوي مش ساهل
لأن المنافسة كبيرة والبداية مرات تكون بطيئة يعني تحتاج وقت شوي باش تبرز نفسك في منصتين، وفي عملاء يتعبوك بكترة التعديلات أو التأخير. وفوق هذا الدخل بالبداية مش ثابت، فالموضوع يبيله صبر واستمرارية أكثر وفهم قوانينهم
ومن أكثر الحاجات اللي لاحظتها إن طريقة تعاملك مع العميل تفرق هلبا ، مرات يختارك لأنك فاهمه وترد بطريقة محترمة حتى لو فيه ناس خبرتهم أكثر منك لان يأثر ع تقييم في بروفايلك
وحاول ما تشتتش روحك من البداية زيني انا جربت اي شي منغير ما نحدد الشي اللي نقدر نقدم فيه افضل ما عندي في بداياتي
ركز على مجال\ مهارة واحدة تعرفها كويس وطور نفسك فيه، لأن هذا يخلي حسابك أوضح ويعطي انطباع أفضل للعميل واكيد توا مع ذكاء الاصطناعي حيساعدك هلبا في كتابة والخ.
و ماتخشش (لا تدخل ) للعمل الحر وطامع\ة في فلوس سريعة من أول أسبوع، لأن البداية غالبا تبدا شوي شوي. حاول تتعلم، تطور من خدمتك، وتبني سمعة كويسة مع الوقت.
وبنسبة للمشكلة الليبين كلها ( بوابة الدفع )
المنصتين عندهم محفظة مالية تلقائية لو معندكش اي بطاقة تربطها في المنصة الفلوس اللي يجوك من العميل تلقائي يخشو للمنصة ع سبيل المثال خمسات مع اخذ عمولة واحد دولار
وتوا مدايرين تحديث وتطوير في منصتين ان لازم ما تربط بوثيقة شخصية (متخافوش انا بروحي درته ) واشياء تانية تخص قوانينهم
فا عندك باي بال او فيزا أو ماستر كارد لو تبي تسحب من المنصة , يحقلك تسحب الفلوس بعد 10 دولار,اقل لا ( ع اخر تحديث نعرفه )
ونصيحة ما تتعاملش مع حد خارج المنصة لان بتتعب وبتنندم معهم ومفيش استرجاع حق ليك حتى المنصة قالت الشي هذا
لو فيه اي استفسار \ معلومة نسيتها انا تقدرو تسألو
وللقاعدين يقرو سواء ثانوية او بداية الكلية ,ابدو من توا خش للمنصة خمسات, ابد فيها وشوف نوعية الخدمات يجيك الالهام انك تتعلم مهارة واطورها وتقدمها افضل من تضييع الوقت في السوشل ميديا والخ ...
