Sabi, lason ang pag-ibig
May nabasa ako rito nung nakaraan. Sabi, lason daw ang pag-ibig sa babaeng may pangarap.
Alam mo ba, araw-araw, walang palya, naiisip kita.
Paggising ko, tinitingnan ko kung may mensahe ba mula sa'yo. Ilang beses kitang kinukulit sa maghapon. Sa gabi, ikaw ang gusto kong kausap. Bago matulog, hinihiling ko sa hangin na sana, maging mabuti ang mundo sa'yo. Kagabi, hindi ako makatulog kakaisip sa kung gaano kalupit sa'yo ang tadhana, kaya nagdasal ako kahit alam natin parehong hindi ako maka-Diyos. Humingi ako ng pabor sa Kanya, na kung isa lang sa'ting dalawa ang pwedeng maging masaya, sana ikaw 'yon.
Minsan, natatakot ako sa kung gaano ako kahandang iwanan ang lahat para sa'yo. Kung paanong ayos lang na ialay ko ang sarili kong buhay kung kapalit no'n ay ang kasiguruhang malalagay ka sa maayos.
Sabi, lason daw ang pag-ibig sa babaeng may pangarap.
Bahagi ka ng mga pangarap ko.
Pero lason ang pag-ibig ko sa'yo.