u/Twite389soicee

هاد العنصرية والكراهية اللي كنشوفها بين المغاربة فالسوشيال ميديا ولات حاجة ما تتقبلش. فبلايص بحال فايسبوك ولا تويتر، كتلقى مجموعات مغربية بحال الشلوح، العروبية، الريافة، الجبالة… كيديرو تعاليق خايبة ومقززة على بعضياتهم. كتشوف شي منشورات فيهم شي فئة كتحاول تنقص من قيمة الفئة الأخرى، حتى كيوصلو يدورو على شي حالات ديال الدعارة باش يلصقوها بمنطقة معينة. هاد الشي ماشي غير سخيف، ولكن حتى حماق حيث كيشوه السمعة ديالنا كمغاربة

وزيد عليها، كاين حتى عنصرية واضحة فين كيتقال أن شي فئات حيت لونهم غامق شوية راه أقل وقيمتهم ناقصة، حيث كيدّعيو أن عندهم أصول من إفريقيا جنوب الصحراء. واش ما كامليناش مسلمين؟ واش ما كنخافوش الله؟ الرسول ﷺ قال: "لا فضل لعربي على أعجمي، ولا لأعجمي على عربي… ولا لأبيض على أسود، ولا لأسود على أبيض إلا بالتقوى والعمل الصالح"

أنا كأمازيغية كنفتاخر أننا كمغاربة كنكونو بمختلف الألوان، ولكن موحدين تحت الهوية المغربية ديالنا