u/SugarRage3

في سنة كنت ف مصيف مع أهلي، واليوم ده كان زحمة شوية على الشط جبنا كراسي بس كنا عايزين كرسي واحد زيادة، كان ف بنت جنبنا عندها كراسي كتير ف بابا قالي بما إنها بنت وكدا روحي إنتِ استأذنيها لو عندها كرسي زيادة.

ف روحتلها فعلًا وقولتلها السلام عليكم، معلش بستأذنك لو ف كرسي من دول زيادة ممكن أخد واحد؟ الطبيعي إنها تقولي لأ محجوزين مثلًا أو لو ف زيادة يبقى تقولي إتفضلي وهاخد الكرسي وخلاص.

بعد ما خلصت كلام بصتلي بصة مش قادرة أنساها وربنا بصتلي من فوق لتحت وكنت مستغرباها وحسستني إني بشحت منها والله، وبعدين قالتلي بكل قرف لأ مفيش زيادة، فقولتلها ماشي شكرًا ومعلش لو ضايقتك ومشيت.

بعد ما أنا مشيت جيه شاب وطبعًا عشان بحر وكدا مكنش لابس تيشيرت وعنده عضلات، راح لنفس البنت وقالها عايز كرسي قالتله اه طبعًا إتفضل ده كرسي زيادة!!!!

هو كدا هيتجوزك يعني ربنا يشفيكي والله

مرة كنت راجعة من الكلية مش طايقة نفسي من الحر، ركبت المواصلات وركبت جنبي ست ومعاها بنت صغيرة متعديش ال٣ سنين وعسولة جدًا جدًا جدًا (ربنا يحفظها لأهلها)

المهم البنت دي كانت بتبصلي وتضحك ومع إني مش طايقة نفسي بس ضحكتها كانت بتخليني أضحك غصب عني، وفضلت ألعب معاها وقولتلها اسمك إيه، البنت كان معاها هوهوز وطبعًا عملت زي ما أغلبنا بيعمل قولتلها ممكن أخدها

ف وأنا بقولها كدا مامتها قالتلي مستحيل تديكي دي بتموت فيها ومش بترضى تدي أي حد منها حتى إخواتها وباباها، وقبل ما تخلص كلام البنت إدتني الهوهوز، ومامتها بتبصلي وتبصلها ومستغربة ف كملت غلاسة على البنت وقولتلها أكلها؟ البنت هزت براسها فوق وتحت إنها موافقة أكلها

اليوم ده كنت عايزة أخد البنت أحطها ف شنطتي وأروح بيها

جماعة كان ف واحد على اليوتيوب اسمه بلال عزت كنت بحب فيديوهاته جدًا هو اعتزل و وقف فيديوهات خالص ولا عمل قناة تانية عشان بدور عليه مش لقياه

حابة أفضفض شوية ده السبب اللي منزلة ريديت عشانه أصلًا بس كنت بستكشفه الأول، ومعلش هيكون طويل شوية.

من سنتين كنت ف جروب لكورس ما وسألت سؤال على الجروب ده بخصوص الكورس، وفي واحد كلمني برايفيت جاوبني على السؤال ومن غير ما أسأله أصلًا ليه بعت برايفيت هو قال لوحده جاوبتك برايفيت عشان ف جزء من الإجابة كان بيرشحلي كورس خارجي وقالي برايفيت عشان محدش يخرجه من الجروب وكدا.

وقولتله شكرًا وفعلًا بدأت ف الكورس اللي رشحهولي وبقى يتابع معايا كان شبه المنتور كدا وبيقولي وصلتي فين وبيشجعني وكدا، بصراحة مش هكدب بعد شهر بدأت أحس إني معجبة بيه جدًا جدًا جدًا وعشان كدا قولتله عايزة نبعد ومنتكلمش تاني هتقولولي طيب ليه ما أنتِ بتقولي معجبة بيه، هقولكم ده السبب أصلًا لإني أولًا معرفش شعوره ناحيتي ومش حابة أعلق نفسي بحاجة أنا مش ضمناها، وثانيًا عشان حرام.

لما بعتله نبعد وكدا، قالي تمام وكنت فاكرة خلص الموضوع، بعدها فضلت أعيط لإني مكنتش عايزة نبعد بس بعدين قولت هو ده الصح وكلامنا حرام حتى لو كل كلامنا عن الكورس مش أكتر، هو قالي تمام الساعة تقريبًا ٢ الظهر وأنا فضلت أعيط ومن كتر العياط تعبت ونمت، صحيت على الساعة ٧ لقيته باعت ريكورد ربع ساعة مش ببالغ هو كان ربع ساعة و واحد تاني عشر دقايق.

ملخص الريكوردين إنه بيحترمني عشان طلبت نبعد وإنه معجب بيا وآخر الريكورد سألني لو أنا جيت إتقدمتلك هتوافقي؟ أنا طبعًا مكنتش مصدقة نفسي ومبسوطة إنه بيبادلني الشعور وقولتله أه هوافق.

من ساعتها بقى نبعد ونتفق إننا هنرجع نتكلم يوم كذا وأنا أفضل أعد الأيام والساعات عشان يجي اليوم ده ونتكلم، وفضلنا على الحال ده سنتين آخر مرة إتكلمنا كان بعد عيد الفطر.

وهو بيكلمني كانت طريقته متغيرة ف سألته مالك، قالي لما عرفنا بعض من سنتين كنت شايف إني بالكتير ف سنة ونص هكون جاهز بس أهو سنتين عدوا وأنا لسة مش جاهز، فكلم شيخ وحكاله وضعنا

الشيخ قاله إنتم بتضحكوا على مين ما أنتم لما تحددوا وقت تتكلموا فيه ربنا مش هيباركلك ولا هييسرلك وقاله كلام صعب من ده كتير، وإن تحديد يوم للكلام ده معناه تحديد يوم لمعصية ولو فضلتوا على الحال ده مش هتتجوزوا ولو اتجوزتوا مش هتعيشوا حياة سعيدة

قالي كدا وأنا بسمعه وقلبي واجعني جدًا لإن كلامه صح وحاليًا إحنا مش بنتكلم من وقتها ومش محددين وقت نتكلم فيه زي الأول

إدعولنا ربنا يجمعنا ف الحلال ♥️