مش عارفة افهم المدخنين بعد ما جربت الفيب
كنت جربت الفيب السنة الي فاتت تقريبا وهو اصلا كان هدية لبابا من قريبنا اصلا بس هو بيحب السجاير اكتر فمكانش بيستخدمه
انا جربته عشان كان بطعم الكابتشيو وصراحة مفيش حاجه حلوة فيه غير طعمه، كنت وقتها في مرحلة وحشة في حياتي وقلت يمكن ده يساعد عشان سمعت ان النيكوتين بيكون مهدئ بس بجد كانت اقذر تجربة، حرق رئتي ووجعها اوي ومحستش بأي تغيير بعدها ولا حسيت بتحسن ولا فهمت الي قاعدين يدمروا صحتهم بالبتاع ده، صعب عليا بس عشان بجد طعم الكابتشينو كان حلو اوي اوي اوي بس اكيد السجاير العادية طعمها مش هيكون كابتشينو او فراولة فالمدخنين مش بيستمتعوا بطعم حلو حتى + البتاع حراق نيك + بيقطع النفس + مش بيهدي حتى
الفكرة قلت يمكن الكابتشينو مفيهوش نيكوتين كفاية وقلت اشطا اجرب الطعم الثاني و اختصارا للقصة كان طعمه دخان عربيات وحرق صدري اكتر وبرضو ولا هداني ولا عمل حاجه وقعدت اشرب ماية ساقعة بعدها علي اساس ان الوجع يروح
التجربة دي كانت مفيدة عشان مستقبلا مجربش الهم ده بس بجد ازاي في ناس بيدمنوا البتاع ده وبيجيبوا لنفسهم سرطان وهو ميستاهلش، ده عيال اصغر مني بسنين وماشيين في الشارع بالفيب واهلهم عارفين وزعلانين وبرضو معندهمش مشكلة