شغال مع جوز اختي وبيخليني ازور شهادات جامعيه
أنا عندي 23 سنة، ومحتاج أتكلم وأخد رأي الناس في موضوع مدايقني جدًا ومخليني مش عارف أتصرف.
القصة بدأت من زمان، لما أختي اتخطبت لواحد كان شغال في أكاديمية بتقدم برامج تدريبية وتعليمية وكده. وقتها أنا كنت صغير، كان عندي حوالي 17 سنة. هو ساب الأكاديمية دي، وبعدها عرفت إنه تقريبًا أخد العملاء بتوعها وبدأ يشتغل معاهم لحسابه.
لما عرف إني بعرف أشتغل جرافيك ديزاين، بدأ يطلب مني أصمم شهادات للعملاء اللي هو أخدهم من الأكاديمية القديمة. وأنا وقتها بصراحة كنت صغير ومش فاهم إن اللي بيحصل ده غلط أو تزوير أو ممكن يبقى فيه مشكلة قانونية أو أخلاقية. كان بيديني على الشهادة الواحدة 10 جنيه، وأنا كنت بتعامل مع الموضوع على إنه مجرد تصميم وخلاص، ومكنتش فاهم الصورة كاملة.
الشهادات دي كانت بتتعمل لناس من السعودية، وهو كان بيقولّي أعملها وهو بيبعتها لهم، أو الله أعلم كان بيعمل بيها إيه بالظبط. مع الوقت الموضوع كبر، وهو عمل لنفسه أكاديمية، وبدأ يسوق للأكاديمية دي على إنها معتمدة من جامعة معينة خارج مصر.
أنا اشتغلت معاه في الأكاديمية دي بقالى حوالي 3 سنين. وهو حاليًا جوز أختي، وعندهم ابن عمره سنة. شغلي معاه مش جرافيك ديزاين بس، هو مشغلني كجرافيك ديزاينر، وبرضه ماسك خدمة العملاء، وبساعده في الإدارة، والداتا إنتري، وحاجات كتير جدًا في الأكاديمية. حرفيًا لو هو مش موجود أنا بعرف أدير أغلب الشغل وأمشي الدنيا، وهو واثق فيا ثقة كبيرة جدًا.
المشكلة إن مع الوقت بدأ يطلب مني أصمم شهادات للجامعة الأجنبية اللي هو بيسوق على إنها معتمدة، وبيكون الكلام دايمًا بحجة إن الشهادة الأصلية متأخرة من الجامعة، والعميل محتاج صورة الشهادة بس مؤقتًا. وأنا في الأول كنت بحاول أصدق الكلام ده.
بس بحكم إني ماسك خدمة العملاء، بدأت أشوف حاجات تقلق. لقيت عملاء كتير بيكلموا ويشتكوا إن الشهادات اتأخرت، وفي ناس بتقول إن الشهادات مش أصلية، وفي ناس بتتكلم عن شهادات مزورة أو مش معتمدة، وكلام من النوع ده. بدأت أحس إن في حاجة غلط فعلًا.
في مرة رنيت عليه وسجلت له المكالمة، مش عشان أؤذيه، بس عشان لو حصلت أي مشكلة في المستقبل يبقى معايا إثبات إني كنت بسأل ومش شريك في الموضوع. سألته وواجهته، وهو قالّي كلام زي: “والله أنا عمري ما أدخل بيتي فلوس حرام، وعمري ما أكل ابني من الحرام”، واتقمص وزعل مني جدًا. وأنا للأسف صدقته وقتها، أو يمكن كنت عايز أصدقه عشان أرتاح.
لكن مؤخرًا الموضوع بقى أوضح جدًا. بقى بيطلب مني شهادات ببجاحة أكتر، والعملاء بيحولوا قدام عيني مبالغ كبيرة، وبعدها هو يبعت لهم صورة الشهادة اللي أنا مصممها. وساعات بيكون الموضوع مش بس جامعة خارج مصر، لا، ساعات عملاء بيبعتوله مبالغ كبيرة جدًا، وهو يطلب مني أصمم شهادة لجامعة موجودة في مصر، وبنفس الحجة برضه: إن الشهادة بتاعتهم متأخرة، وإنهم محتاجين صورة الشهادة بس.
وفي يوم كنت عنده في الشقة، وفتحت درج معين أنا عارف إنه بيحط فيه أوراق الشغل. لقيت الشهادات اللي أنا مصممها مطبوعة كلها ومختومة بأختام من عنده، على أساس إن دي أختام الجامعة اللي برا. وده خلاني أتأكد إن الموضوع مش مجرد صورة مؤقتة ولا حاجة، وإن في تزوير فعلي بيحصل.
أنا دلوقتي حاسس إني متورط في حاجة غلط جدًا، دينيًا وأخلاقيًا وقانونيًا. مش عايز أكمل في الحرام ده، ومش عايز أبقى سبب في إن حد ياخد شهادة مزورة أو يدفع فلوسه في حاجة مش حقيقية. وفي نفس الوقت أنا مش عارف أطلع من الموضوع بسهولة.
أنا من زمان جدًا شغال معاه، فمعنديش بورتفوليو قوي أقدم بيه على شغل برا. مكنتش ببني بورتفوليو ولا مهتم أجهز نفسي لسوق العمل، لأني كنت حاسس إني في مكان ثابت، وإنه جوز أختي ومستحيل يمشيني. وده خلاني للأسف أتأخر في بناء نفسي مهنيًا.
أنا عندي 23 سنة، وعايز أبني نفسي. بحب بنت وعايز أجهز نفسي عشان أدخل في خطوبة، وعايز أشتري شقة أو أجهز شقة أو أجيب أجهزة وأبدأ حياتي. أهلي مش معاهم إنهم يجهزوني، فكل حاجة تقريبًا عليا أنا. فكرة إني أسيب الشغل من غير بديل مرعبة بالنسبة لي، خصوصًا إن مرتبي أصلًا قليل جدًا مقارنة باللي بعمله.
أنا شغال معاه جرافيك ديزاين، وخدمة عملاء، وبساعد في الإدارة، وداتا إنتري، وبمشي حاجات كتير جدًا، وكل ده بمرتب 11 ألف جنيه. وفي نفس الوقت هو بيدخله فلوس كتير جدًا، ممكن حوالي مليون جنيه في الشهر. ومع ذلك هو دايمًا مهتم أكتر إنه يجيب مسوقين جداد، لأن كل مسوق بيجيب عملاء وياخد نسبة، ومش مهتم يجيب إداريين أو يقسم الشغل بشكل محترم.
اللي مصعب الموضوع أكتر إنه مش شخص وحش معايا طول الوقت. بالعكس، ليه مواقف كتير كويسة معايا. ساعات بيساعدني في مشاكلي مع أهلي، وبيساعدني في مشاكلي الشخصية، وساعات بيساعدني ماديًا، ووقف جنبي في مواقف. فالموضوع مش أبيض وأسود بالنسبة لي.
هو كمان شخص بيعرف يتكلم كويس جدًا. Sweet talker جدًا، وعنده قدرة إقناع رهيبة. لما بتكلم معاه أو أواجهه، بلاقي نفسي مش عارف أرد، وبيعرف يلف الكلام ويخليني أصدق أو أحس إني مكبر الموضوع. وده بيخليني أتلخبط أكتر ومش عارف آخد قرار واضح.
غير كده هو جوز أختي، وعندهم ابن عمره سنة. أنا مش عايز أعمل مشاكل في العيلة، ولا أقول لأهلي أو أهله، ولا أكون سبب في فضيحة أو خناقة كبيرة أو طلاق أختي أو خراب بيتها. وفي نفس الوقت مش عايز أقطع رزقها أو رزق ابنها. بس برضه مش قادر أكمل في حاجة أنا شايفها غلط وحرام.
أنا حاسس إني محشور بين كذا حاجة:
إني أكمل في شغل فيه تزوير وشبهات حرام.
إني أسيب الشغل وأبقى من غير دخل وأنا محتاج أجهز نفسي.
إني أواجهه وأدخل في مشاكل عائلية كبيرة.
إني أسكت وأفضل جزء من حاجة غلط.
أنا محتاج نصيحة بجد من الناس اللي عندها خبرة أو مرت بموقف قريب من ده.
أعمل إيه؟
أسيب الشغل فورًا ولا أستنى لحد ما ألاقي بديل؟
إزاي أطلع من المكان ده بهدوء من غير ما أعمل مشاكل في العيلة؟
إزاي أحمي نفسي قانونيًا لو الموضوع كبر؟
هل التسجيل اللي معايا ممكن يفيدني لو حصلت مشكلة؟
إزاي أبدأ أبني بورتفوليو بسرعة وأنا أغلب شغلي كان في الأكاديمية دي؟
هل أواجهه تاني ولا أبعد تدريجيًا؟
ولو حد عنده شغل مناسب ليا في الجرافيك ديزاين أو خدمة العملاء أو الإدارة أو الداتا إنتري، ياريت يتواصل معايا وأنا أبعتله شغلي.
أنا مش عايز أكمل في حاجة غلط، ومش عايز آكل من فلوس حرام، بس في نفس الوقت خايف جدًا أخسر دخلي وأعمل مشكلة كبيرة في العيلة، ومش عارف أبدأ منين.