قصدي حتى الوطنجية الي عندنا ما شفتش يديروا فيها، وما عمري شفت ليبي نسب تراث دولة مجاورة ليه، ويتكلم بجدية عليها.
والله والله والله مش قصدي فتنة، أنا بس نتسأل.
لأنه في حاجات سرقة عيني عينك، و مانيش عارف ليش يديروا فيها بعض مواطنين الدول الجارة الشرقية والغربية
(بنمسح البوست بعد كم ساعة )
بالله لو أنت مش مولود، أو صغير، أو ذاكرتك ما تساعدش في هذاك الوقت، ما تجاوبش
أنا كنت صغير في هذاك الوقت باش نقدر أنكون فكرة عن الشيء هذا، فنبي نعرف الناس الي عاشت هذاك الوقت عن رأيها
حسب الي سمعته، أنه كانوا زي العائلة، وما كانوش يحملوا الكره بين بعض، وأنه الترابط والتلاحم ما بين المواطنين كان قوي جداً ، ولما يصير حدث حساس يشمل منطقة، في من الي كان عنده سلطة يستغله لتركيب الناس بين بعضها لاغراض شخصية، ولكن ماكانش لها تأثير يذكر، وأنه المحبة والرؤية العامة الكويسة بين المدن كانت السائدة.
للأسف أجيال طلعت، وأنا جزئيا منهم، ما عاشتش الشيء هذا، ومش عارف كيف الصدع والجروج الي أندارت خلال هذه السنين والي منها من الي قبلها، راح تتعافى وتتصلح.
بس الواحد يكون متفائل بالله ديما :)
وبالله يشارك بس من عاش هذاك الزمن.
أقسم بالله خلاص يجماعة مستحيل الي نشوف فيه 😭 كل مرة يطلعلي واحد مغربي ويهبد على الأجانب، وديما يكون من الشتات، ويبدا بالهبد، وترويج شيء مش موجود على أرض الواقع، وعدم ذكر أشياء معينة باش توهم المتلقي بشيء ثاني.
يعني مثلا ما يقولوش أنه المغاربة متواجدين في كل أنحاء الوطن العربي،وأنهم يشتغلوا في الإعلام والبرامج، وما يذكروش أنه فيه أكثر من لهجة في المغرب، أو أنه المغاربة يفهموا تقريبا كل لهجات العرب ( يحاولوا يقولوا أنه الحالة متبادلة بحيث أنه المغربي ما يقدرش يفهم باقي اللهجات; ترويج أنها لغة) والبعض ما يذكرش أنه أي مغربي حصل على تعليم، فهو قادر على التكلم بالفصحى، يتكلموا كأنه شيء صعب ومش شائع. يحاولوا يروجوا أنه المغاربة مش متواجدين في الكومينتي العربي
خلاص كرهت كلمة "الدارجة" مستحيل الاستفزاز الي يديروا فيه بالكلمة هذه، ومش راح أنعاود الكلام الي قلته في منشوري السابق.
المغرب نفسها في لهجات مختلفة، لو ما فهمتش كم كلمة مش يعني انها لغة ثانية! السعودية ما شاء الله، لهجات واجدة، وصعب أنك تفهمها لو مش من أهل المنطقة، ولو كل واحد يتكلم بلهجته قح، مفيش حد بيفهم الثاني 100٪ وهذا حرفيا متواجد في كل اللهجات وتنوعها
يجماعة عارف أني كاتب جريدة، ولكن لازم "أنفش غُلي" وبالله قولولي أنه مش بس أني الوحيد في هذا 😭. لأنه في كل مرة لازم نشرح للاجنبي المغالطات المنقولة، وإيهامه بأشياء ماهيش موجودة، لأنه قمة الاستفزاز لما يجي يقولوك تتكلم دارجة ؟ باعتقاده أنه كل المغرب العربي يتكلموا الوهم المسمى الدارجة (في منشوري السابق وضحت مشكلتي عن هذا )
قبل شهور، ذكرت أنه هل يمكن اعتبار ليبيا من المغرب العربي في وقتنا الحالي. وعللت أسبابي، وواحد منها أنه ليبيا ديما منسية ومش محطوط في غالب الأحيان في بال المغاربة ولا الأجانب لما تقول المغرب العربي أو شمال إفريقيا.
أمبكري شفت منشور عن شمال إفريقيا، وحتى هو نفس الشيء، ليبيا مستبعدة. حتى في تعليقات المنصات الثانية شمال إفريقيا = تونس/الجزائر/المغرب فقط في غالب الأحيان.
شن احساسكم عن الاستثناء هذا الدائم؟