المواطنين اللي ساكنين في مجمعات سكنيه يحرجون الواحد
حبيت اشارككم ب تجربتي في السكن في مجمع سكني معضم سكانه اجانب. و عدد المواطنين اللي ساكنين فيه قليل يعتبر و الاغلب طبعا مستاجر. ف بين فتره و فتره لما اشوف عائله اماراتيه يديده انتقلت عندنا استانس انه عددنا يزيد في المجمع و نقدر انكون علاقات و صداقات يديده معاهم.
لكن للاسف بسبب تصرفاتهم المحرجه و اللي <للاسف> اعتبرها غير حضاريه، اتردد حتى انني اسلم عليهم او انه اخلي عيالي يقربون منهم. بعطيكم بعض الامثله عسب تعطوني رايكم:
في فتره قبل المغرب، يطلعون اغلب الصغاريه عسب يلعبون في حديقة الالعاب. و طبعا يصير فيه اختلافات و مشاكل بينهم <و هذا يعتبر شي عادي و متوقع> لكن اغلب التصرفات الوقحه و المحرجه تكون من عيال المواطنين. سب و لعن و مضارب مع الاجانب. شي محرج الصراحه جنهم مب متربين.
رمي <عزكم الله> الزبايل في الشارع. مع انه مخصصين في المجمع غرف و اماكن مخصصه لها. لكن بعض المواطنين بالاخص يرمون الكجره جدام البيت. ولنه الرصيف صغير، الساير و الراد يمشي جنب المخلفات هذي. شي محرج والله. حاولنا انكلمهم اكثر من مره لكن ما يستحون الصراحه.
مخالفة قوانين الباركنات. المجمع صغير و كل بيت مسموحله موترين. و اذا زادو المواتر فيه طريقه يقدر الشخص بيركن فيها عسب ما يسكر على الرصيف. لكن واللاسف، اغلب اللي يخالفون هم المواطنين. يبركنون وين ما يبون. فوق الرصيف. على معبر المشاه، عند مدخل المجمع. يحرجون الواحد والله!
المغزى من الطرح هذا هوه انه الواحد يستغرب و يستعجب كيف انه عيال بلادنا للاسف تصرفاتهم محرجه جدا لما يسكنون في ها النوع من المجمعات. بس بغيت اشوف رايكم، هل انا مكبر الموضوع ولا صدق فيه شي لازم نواجهه ك مجتمع.