اني طالب جديد د27 اخذت اعفاء عام قبل جم يوم وقبل 3 ايام بالضبط بديت محاضرات السادس وبديت اتعرف ع السادس واستوعبه *ماعندي الا خبرة سطحية يعني*
طبعا اني طوال سنين الرابع والخامس وحتى الثالث متوسط جنت متعود العربي واغلب المواد العلمية "حتى ادرسهن واحفظهن" افتح اليوتيوب واتابع اي مدرس جيد يشرح على هاي المادة واي شي يكتبه بالصبورة سواء من قواعد او قوانين او غيرها اكتبه بدفتر خاص وارتب المعلومات والملاحظات بطريقتي الي افهم عليها واكعد احفظ عليها بدون ملازم او ملازم اليي يسووها مدرسين مدرستنا بس
لكن العربي 100% جنت معتمد بيه عاليوتيوب والنقل من اليوتيوب ع الدفتر وهالشي كلش فادني وخلاني افهم المادة واحفظها وافهمها وبسببها درجاتي بالعربي ما تنزل عن التسعين بوكتها
ومن بديت السادس استمريت على نفس الطريقة واختاريت حمزة الجابري عاليوتيوب ومشيت بمحاضرات الاساسيات مالته ونقلت معظمها بالدفتر
بس بنص هالشي شفت اله فديو قديم " من 2025" يحجي بيه عن طريقة دراسة القواعد ويكول بيها انه لا تعتمد عالدفتر نهائيا بسبب انه راح يسحب وكت كلش هواي منك وانت تكتب وتنقل وترتب وما راح تلحك تنقل اغلب المحاضرات بسبب ضيق الوقت بعدين
لذلك كال اعتمد عالملزمة مالته والملخصات والقصاصات وتأشير بس
فسمعت نصيحته وعفت الدفتر وبديت على ملزمته وسويت كل نصايحه بس حسيت اني ما كاعد احفظ شي بالملزمة وكاعد انسى اغلب الي قريته مهما عدته او حفظته او شفت محاضرات اله
ف اني حاليا كلش حاير
هل استمر على الملزمة واعود نفسي بالغصب عالفهم والحفظ او ارجع عالدفتر واخاطر بضياع الوقت ؟؟
والمشكلة اني خايف استمر عالدفتر لان كلامه فعلا صحيح لان قبلها بالخامس اجتني اوقات ما كدرت انقل اي شي للدفتر واعتمدت على تلخصيات او رؤوس اقلام بس بسبب ضيق الوقت
اسف على الازعاج والكلام الطويل
اتمنى انكم فهمتوني واتمنى منكم اي نصيحة لو مساعدة 🫶