تجارب مواقع الزوااج
السلام عليكم, من حوالي 3 شهور سجلت في كذا موقع وتطبيق للزواج على أمل العثور على شريكة حياة مناسبة. حاب اشارك تجربتي الكاملة حتى اللحظة ونوعية الناس اللي شفتهم هناك. وحاب اسمع منكم اذا عندكم تعقيب معين او توجيه.
لين الحين تحادثت مع 24 بنت وامرأة ولا زلت بدون تقدم يذكر. كتبت سطرين ملخص عن عن كل ها ال 24 حالة. اللي بس مهتم بملخص التجربة يقدر سوي سكيب من هني لين آخر فقرة (الملخص).
توضيح:
كلمة "فاول" = حاولت اخذ واعطي بس الطرف الثاني اكتفى بالقراءة وعدم الرد لمدة طويلة (ايام مب ساعات). من كثر ما تكرر الشي بغيت اختصر التعبير بكلمة وحدة.
-1-
اول تواصل بادرت انا مع البنت وسألتها اذا حابة تتكلم عن نفسها وحياتها, قالت ها مب برنامج حق ضحك ومصخرة, قلت لها البروفايل مالج فاضي و بس كاتبة "اثناء التواصل", قالت انت شكلك تبا تستكشف البرنامج كمل استكشاف. من اولها لا اسلوب ولا حسن ظن, ما كملت.
-2-
ثاني تواصل البنت بادرت, اسلوبها راقي وتفاءلت بس اليوم اللي عقبه اختفت وما رجعت, يمكن نست الموضوع ولا كانت
تجرب بس.
-3-
ثالث تواصل بنت عربية ابدت اهتمامها, اعتذرت منها لانها مب في الامارات, لو هي هني ممكن اعطي الموضوع فرصة.
-4-
رابع تواصل انا بادرت, سألتني شو برجك؟ قلت كذا, قالت ما بيننا توافق.
-5-
خامس تواصل هي سوتلي لايك بس انا بادرت بالتواصل, قلت السلام عليكم وشكرا على الاهتمام, بندت حسابها.
-6-
البنت بادرت, بداية جيدة وتعارفنا بشكل جيد مقارنة بما سبق وقالت لي عندنا وايد امور مشتركة, بس الحوار معظمه كان أسئلة منها وأجوبة مني, يوم بديت انا أسألتها قامت تردت علي بتنكيت, مثل يوم تسأل حد: وين ساكن؟ يقول لك ساكن في البيت (مشيتها قلت يمكن هي تحب تنكت ولا مالها بارض اليوم, بسألها باجر), اليوم اللي عقبه محادثتها اختفت.
-7-
البنت بادرت, سألتني شو التطبيق وياك؟ انا احسه جنه Tinder نسخة اسلامية يضحك الشي, وكملت طريقها. حديث عابر لكني غير مستاء, الناس بطبيعتها عندها فضول عن الاشياء وتحب تشارك انطباعاتها.
-8-
البنت بادرت بس كانت منفصلة ومعاها طفلين, اعتذرت.
-9-
عيبني بروفايلها وبادرت وياها, بعد فترة بسيطة عطتني حسابها الشخصي في السوشال ميديا لأن المحادثة في البرنامج يبالها اشتراك, تواصلت وياها هناك, ردت علي اول يوم ومن بعدها فاول.
-10-
بادرت مع بنت فيها كثير أشياء عجبتني ما عدى الجنسية, جوازها من دولة غير مستقرة لكن مولودة ورابية ومستقرة في الامارات وتكتب بلهجة اماراتية, شفافيتها بحد ذاتها شي يرفع له القبعة. كنت متردد في البداية بس بعد تفكير قررت اعطي الموضوع فرصة. انسانة محترمة ولبقة جدا في الحديث بس للأسف بندت حسابها.
-11-
بادرت مع بنت بعد اعجاب متبادل, لا زلت على تواصل خفيف معاها بس التواصل وايد بارد, رسايلها معظمها كلمة كلمتين وغالبا انا اللي ابادر و اكتب واسأل. ما اتوقع اني بكمل.
-12-
البنت بادرت وقالت عيبها شي كاتبنه في البروفايل مالي, شكرتها وعطيتها تفاصيل شوي عن الشي اللي طرته, فاول. طرشتلها اسلم واتخبر عقب كم يوم, فاول.
-13-
بادرت مع بنت واخيرا حسيت انه فيه مجهود وقبول متبادل بعد كم يوم من المحادثات, بس للأسف ما كملنا. واحد من شروطي هي التواصل مع البنت والالتقاء بها قبل لا اتقدم لها (للي يعاني من سوء الظن: مب للتغزل و الوقوع في الحب, الهدف تكوين معرفة وصورة مسبقة عن الطرف ثاني وفهمه بشكل أعمق واتاحة الفرصة له كذلك لنفس الشي, فيه امور النظرة الشرعية التقليدية ما تلبي لي اياها). اعتذرت البنت وقالت ان هذا الشي ما يتقبلونه, احترمت قرارها وتمنيت لها الخير. قالت لو وضحت لي ها الشي من البداية كان افضل وبيختصر علينا, معاها حق واعتذرت لها. عقبها عدلت بروفايلي ووضحت ها النقطة.
-14-
بادرت بنت, وضحت لها شرطي من البداية, اعتذرت مني.
-15-
بادرت مع بنت ووضحت لها الشرط, قالت اول تكلم عن تفسك شوي عسب نشوف, كتبت لها فقرة عن نفسي, فاول. بعد كم يوم فاول ثاني.
-16-
بادرت بنت وأبدت اهتمام, قالت لفتني ملفك وما ابغي منك شي بس ابغي اساعدك بالكلام, مافهمت عليها قالت حابة نتكلم بس ما ابغيك تفهمني غلط, قلت تفضلي, قالت شو رايك في بروفايلي؟ قلت جيد وفيه نقاط ملفتة وكذا وكذا, عقب ما قرت سوتلي بلوك.
-17-
بادرت بنت وتعارفنا بشكل خفيف والامور مشت بشكل جيد, عقب يومين القيت نظرة على بروفايلها مرة ثانية وانتبهت لشي ما ركزت عليه قبل, في خانة التدخين كاتبة "ڤيب". سألتها عنه قالت هيه للأسف تڤيب, شكرتها على شفافيتها
واعتذرت منها.
-18-
بنت بادرت وكملت معاها شوي لين ما قالتلي انها من جنسية عربية (في البروفايل إماراتية), اعتذرت منها (لأني حسيت اني انخدعت مب لأنها مب إماراتية).
-19-
بادرت مع بنت بعد اعجاب متبادل. مسلمة غير عربية, اصولها مختلطة, اكبر مني ب 3 سنين. البايو مالها شدني ومكتوب باسلوب جميلا جدا. تعرفنا بشكل خفيف وكانت تاخذ وتعطي اول يومين بس عقبها فاول. سألتها اتطمن على صحتها (هي كانت طالعة من المستشفى من كم يوم) قالت انها بخير, وعقبها فاول, وفاول ثاني, اعتذرت وقلتها لها ما راح اكمل, طبعا فاول.
-20-
بادرت بنت بعد اعجاب متبادل, تحادثنا بشكل خفيف وعقب سألتني عن شي في مجال تخصصي وقالت لي مشكور ما تقصر كنت ابغي رايك بس.
-21-
بادرت بنت و بدأت بطريقة غريبة جدا: انت عندك امل تحصل بنت محترمة وانت ثلاثيني مب متزوج؟ لا تتحرونا غبيات ترا كلنا نعرف سوالفكم.. سويت بلوك وريبورت, ما رديت عليها, اي سوالف واي غبيات شو السالفة.. جيكت عبروفايلها لقيتها كاتبة كلام رخيص جدا في البايو ما اقدر اكتبه هني.
-22-
بادرت انا بعد اعجاب متبادل, فاول.
-23-
اعجاب متبادل, من دولة عربية**,** محادثات** **خفيفة على مدى كم يوم, خذت انطباع جيد عنها بس يوم جيكت على بروفايلها مرة ثانية لاحظت انها أم (اول مرة ما انتبهت), سألتها بشكل خفيف عن عيالها قالت عندها ولد عمره سنة, عقب كم ساعة سوت الغاء اهتمام. مادري يمكن انزعجت من السؤال, عموما هي كانت محترمة وياي والله يكتب لها التوفيق في مسعاها
ويحفظ لها ولدها.
-24-
بادرت معاي واعتذرت منها (اكبر مني ب 12 سنة وعندها عيال).
الملخص:
24 محادثة ولا وحدة منهم اثمرت: 12 لعدم جدية او التجاهل, 6 لعدم التوافق من طرفي, 4 لعدم التوافق من طرفها, 2 لأسلوب سيء وقلة اجترام.
. النتيجة ما تشجع وايد بس بالي طويل, بستمر شهر شهرين لعل وعسى نتوفق.
عندي شوية ملاحظات لأخواتنا:
وايد بروفايلات مخلين مكان البايو/النبذة فاضي, ولا تحصلهم حاطين ايموجي قلب. الزواج والعلاقات تقوم على مجهود, لما اشوف صاحب البروفايل ما بذل مجهود بسيط يكتب عن نفسه حتى لو سطر انا ما آخذ انطباع انه راح يبذل مجهود في العلاقة بعدين.
انا مب ضد ان الوحدة تكتفي ب عبارات عامة مثل "ريال يخاف الله فيني", "رجل بمعنى الكلمة", "يحترم المرأة", كل حد يعبر باللي يرتاح له. مشكلة ها العبارات انا شخصيا ما تفيديني لأنها متكررة ومستهلكة وما اعرف بالضبط شو المقصود منها, لو تسأل 10 اشخاص شو معنى "يحترم المرأة" بتحصل 10 اجابات. استبدال ها العبارة ب "يدعم طموحاتي ويشاركني اهتماماتي ويسمعني" مثلا يفرق وايد, سمت احتياجاتها او توقعاتها.
يعطيكم العافية.