يا جماعة أنا بجد وصلت لمرحلة إني بقى عندي عقدة من تمرينة الديدليفت وأي تمرين ظهر محتاج تثبيت الظهر زي البار رو أو الترمبة.
الموضوع مش إن التمرين صعب أو الأوزان تقيلة… المشكلة فيا أنا فعلًا.
كل ما أجي أعمل ديدليفت مثلًا وأنزل بظهري، بلاقيه مقوس شوية ومش ثابت على وضع مستقيم، وده مخوفني جدًا من الإصابات خصوصًا إن التمرين نفسه غشيم.
الموضوع وصل معايا إني بقيت بتجنب التمارين دي خالص وبطنشها.
المشكلة إن تقوس ظهري مش دايم:
وأنا واقف أو ماشي عادي
لكن أول ما أميل عشان أرفع وزن بيظهر التقوس
وأغلب الظن إن السبب إني بقعد على المكتب ساعات طويلة جدًا يوميًا، فظهري اتعود على الوضع الغلط وبقى بينحني تلقائي.
دلوقتي بجد حاسس بإحباط شديد من الموضوع ده، وبقيت كاره نفسي بسببه.
هل حد مر بنفس المشكلة؟ وهل في حل فعلي يخلي ظهري يثبت صح في التمارين دي؟
أي نصيحة أو تجربة هتفرق معايا جدًا 🙏