ادعولي اعيش حياه سعيده طبيعيه
قصتي باختصار لاني علي وشك الانهيار النفسي اللي بعده هبقي مجنون حارتكم
انا بعاني من كره الذات
باختصار انا بيتم مواساتي بشفقة من اهلي قصاد عيني انه معلش هيا قدراتها ومستواها كده معلش هيا مبتعرفش تتكلم ودبش شويه معلش هيا مبتعرفش تتعامل اوي. واهلي مبيعتمدوش عليا فاي حاجه بيعتبروني دايما عبيطه مش هعرف اتعامل مش لماحه ولا مدردحه
مش بس اهلي تؤ تؤ صحابي كمان مره صحبتي "قالتلي اي يا حمار"بدون اي وجه حق وواحده مره قالتلي انت دماغك فاضيه
دا ببساطه جزء من الالم اللي بعيشه طب انا بقا
من جوايا ومن زمان حاسه بالخلل وحاسه بالنقص والتاخير والسذاجه عن صحابي ايوه فعلا انا كدا بس كنت دايما بحاول اطور من نفسي وكنت بتشهتف علي كلمه اي كلمه تحسسني اني اتقدمت خطوه اشوف دا فنظر حد اشوف حد جاي يطلب رايي حد يناقشني فقرار حد يجادلني ففكرة .انما بتصدم ومبفهمش ليه حتي لو حد فتح معايا نقاش الاقيه بعد رسالتين بدأ ي امممم واه والردود دي ويقفل الكلام
طب ليه
انا قلت اي غلط او غبي
طب فهمني
انا فقمه الياس والانعزال والاكتئاب والخوف والفشل ومكسوره جدا من اني مش الشخص اللي اهله وصحابه يفتخرو بيه وبقيت بشفق علي نفسي اني عمري ما هلاقي الشخص اللي يحبني ويشوفني مميزه ولا اني الشخص اللي اتمنيت اكونه حاولت اغير الظروف وحاولت اتعايش معاها وفالحالتين نفسيتي متحطمه
حاجه الانسان للتقدير والاحترام من نفسه ومن الناس مش رفاهيه وممكن انعدام دا يقتله بالبطئ حاجه الانسان لثقته وتقديره لنفسه يمكن اكتر سبب هيخليه عايش وقوي
انا كل ثانيه ببقي نفسي اختفي نفسي كنت اتحب واتقدر واتفهم وافهم وابقي حد احسن بس اللي بلاقيه اخر كل طريق هو سراب
نفسي اهلي يحبوني وانا احب نفسي
اسفه اني طولت بس كان لازم اطلع اصرخ او اموت دلوقتي
وشكرا لاي حد رحيم بغيره وبيعرف يرشد من غير ما يجرح اللي قدامه ولا بيسيبه غرقان ويقول مليش دعوه