مش عارفة استوعب اني لما اجي اتخطب واتجوز انا اللي هجهز نفسي بنفسي. خايفة من حجم المسؤولية.
انا فتالتة جامعة، بدرس فجامعة خاصة وفالاجازة هشتغل عشان اغطي مصاريف اخر سنة دراسة.
بابا موجود لكنه مديون واخد قرارت كتير غلط فحياته وضيع الحاجات اللي كان مأمن بيها مستقبلي والدهب.
انا بتخطى دا حاليا وبسامحه، بس بفكر حاليا ف مستقبلي، كوني مضطرة اجهز نفسي وقت ميجي النصيب.
اللي اعرفه حاليا (واتمنى التصحيح لو عندكوا معلومة) انه البنات بيبقى عليهم الخطوبة، والبنات بتجهز نفسها فالجواز سواء بالمطبخ واللي جواه او الاجهزة والملايات والفوط والخ. او النص بالنص
انا سنة وهتخرج وهفهم سوء العمل اكتر، ونوع الفرص اللي قدامي واللي هيدخللي كل شهر وهكذا، بس حاسة اني هلاقي نفسي فدوامة تحضير وتحويش وارهاق كأني بدون اب. ومش عارفة ازاي هقدر اجمع المبالغ دي لوحدي
دا غير ان تكلفة المعيشة نفسها صعبة جدا ومظنش انه هلاقي حد مستعد يتكفل بكل المصاريف سواء الخطوبة والجهاز او المعيشة نفسها وقت الجواز
قلقانة مالمسؤولية وخايفة الاقي نفسي مش قادرة اعمل لنفسي حياة كويسة
انا ممكن اكون اقوى مما انا متخيلة ودا وقت ضعف، بس فعلا قلقانة اوي من اللي جاي