العائلة ديالي والناس لي قراب ليا، حتى واحد ماتاق بهادشي لي كنقول، وكلشي قال ليا بلي غير أثرات فيك الموت ديال صاحبك. وكاين كاع لي ولا كيقول راني حماقيت حيت صاحبي كان عزيز عليا بزاف.
عافاكم، أنا جيت نعاود ليكم هادشي هنا، يلا كنتي غاتزيد عليا حتى نتا بنفس الهضرة ديالهم، غير بلاش ماتزيد عليا. وحتى يلا بنت ليك حماقيت، على الأقل قول غير كلمة زوينة ولا حاول تلقى ليا شي حل...
كانت شي التلاتة دالليل. وأنا كنت فداري ناعس حتى قفزني التيليفون، شفت فالساعة لقيتها 03:15. شفت فالشاشة لقيت النمرة ديال صاحبي عادل.
جاوبت بالزربة قلت ليه ألو عادل اش كاين فهاد الليل؟
قال ليا وصوتو كان كيترعد وفيه واحد الخلعة غريبة، خويا عتقني راني واحل ومابقيت فاهم والو.
قلت ليه وأنا مخلوع فين واحل أصاحبي اش واقع ليك؟
قال ليا راني فالطريق البيست لي مورا الغابة د بوسكورة، الطموبيل سكتات ليا ومابغاتش تزيد والدنيا هنا كحلة كاين غير الضلام.
قلت ليه بقى فبلاصتك وسد عليك الطموبيل راني جاي دابا نلبس غير حوايجي.
قال ليا زرب أخويا راه كيبان ليا شي حد كيدور بالطموبيل. وتقطع الخط.
ركبت فطموبيلتي وكسيريت. الطريق كانت خاوية، ملي وصلت للبيست دالغابة بقيت غادي بشوية كنضوي بالفار حتى بانت ليا الطموبيل ديال عادل واقفة فالجنب.
وقفت وراها وضربت ليه الكلاكسون، واحد الشوية بان ليا الباب دالطموبيل ديالو تحل وخرج عادل كيجري حل الباب ديال طموبيلتي وركب بالزربة.
قلت ليه وأنا كنشوف فيه كانت حالتو حالة، مالك أصاحبي كترعد اش هاد الروينة؟
قال ليا كسيري زيد بينا من هاد البلاصة عافاك.
قلت ليه واش نسيتي طموبيلتك محلولة واش تسطيتي؟
جاوبني وهو كيشوف فالمراية دالجنب بحال يلا خايف شي حد يتبعنا، خليها تما مابغيتش نرجع ليها غير زيد.
الريحة ديال عادل كانت غريبة، بحال الريحة ديال الغيس مخلطة مع شي حاجة غريبة.
شفت فيه وقلت ليه دابا تقدر تعاود ليا اش وقع؟ شكون هادا لي كان كيدور بيك؟
قال ليا كنت غادي عادي حتى بانت ليا واحد البنت واقفة وسط الطريق، ضربت الفران بالجهد الطموبيل سكتات وملي هبطت نشوف واش ضربتها...
قلت ليه شنو؟ لقيتيها؟
قال ليا مالقيت تا واحد، ولكن ملي رجعت للطموبيل سمعت شي حد كيضحك اللور، مابغيتش نشوف فالمراية عيطت ليك ديريكت.
يلاه بغيت نجاوبو والتيليفون ديالي بدا كيصوني تاني. هبطت عيني للشاشة ولقيتها النمرة ديال هشام خو عادل الكبير.
قلت لعادل هادا خوك هشام كيصوني واقيلا حتى هو عيطتي ليه وخلعتيه؟
عادل ماردش عليا بقى غير كيشوف قدامو بحال يلا ماسامعنيش.
هزيت التيليفون ودرت Haut-parleur باش يسمعنا عادل وجاوبت.
قلت ليه ألو هشام هانية أخويا؟ راه عادل معايا دابا فالطموبيل راني عاد مشيت جبتو من الغابة.
ولكن هشام كان كيبكي. قال ليا اشمن عادل معاك، عادل راه دار كسيدة خايبة هادي ساعتين فالطريق دالغابة.
قلت ليه وأنا كنضحك واحد الضحكة دالخلعة واش كتهضر من نيتك؟ واش ضاربين شي طاسة نتا وخوك وكطنزو عليا راني قلت ليك راه جالس حدايا دابا؟
قال ليا هشام وصوتو زاد فالبكا، والله ماكنكذب عليك راه يلاه عيطو لينا البوليس قالو لينا الطموبيل ديالو تقلبات ومات فالبلاصة، راني دابا واقف قدام الثلاجة فالسبيطار يلاه شفتو.
كنت غادي نغيب.
قلت ليه هشام واش متأكد؟
قال ليا واش غنكذب عليك فالموت د خويا؟
قطعت الخط، كنت خايف ندور وجهي لجيهة اليمين خايف نشوف شكون هادا لي ركب معايا.
قلت ليه وأنا كنترعد، عادل سمعتي خوك اش قال؟
ماردش عليا.
دورت راسي بشوية جيهتو، الكرسي كان خاوي.
ماكان حتى واحد حدايا، الباب كان مسدود.
كسيريت لدار ديك الساعة وأنا كنترعد. دخلت وسديت عليا الباب وبقيت جالس فالأرض شي جوج سوايع كنشوف فالحيط، كانت فيا واحد الخلعة لدرجة عيني فيهم الضبابة، عقلي مبلوكي ومسدوم مامتيقش اش واقع. مابقيتش عارف شكون هاداك لي ركب معايا، وشكون لي صونا ليا، وعلاش هادشي كامل وقع فنفس الوقت لي صاحبي مات فيه.
من بعد نضت بزز مني ومشيت للسبيطار عند خوه هشام. دخلت لامورڭ وشفتو فالثلاجة، بصح عادل مات الله يرحمو.
ولكن الصدمة الكبيرة هي ملي خرجت من السبيطار مع الصباح ورجعت ديريكت للغابة لنفس ديك البيست فين عيط ليا ولقيتو بالليل، مالقيت والو لا طموبيلتو لا والو.
تما عاد طاحت عليا فبالي بلي راه يلا مات فديك البلاصة البوليس غايكونو جابو الديباناج وداو الطموبيل. سولت خوه هشام وقال ليا بلي راه بصح البوليس داو الطموبيل.
ولكن البلان لي حمقني هو الوقت... الوقت لي مات فيه عادل والبوليس جاو هزو الطموبيل، كان قبل من الوقت لي عيط ليا فيه أنا! يعني ديك الطموبيل لي وقفت موراها أنا بالليل ماكانتش ديالو...
من داك النهار وكيوقعو معايا أشياء العقل ماكيتقبلهاش غادي نعاودها ليكم.
يتبع...