What if there's someone better ?
سلام
أنا طفلة في عمري 24 سنة، جامي دخلت في علاقة من قبل لأسباب دينية و شخصية و أصلا جامي كانو عندي مشاعر حب لشخص ما،
من صغري وأنا نحلم نتزوج و نعيش حياة زوجية سعيدة تأثرت بزاف بمحيطي وعائلتي لي أغلب علاقاتهم الزوجية ناجحة و الحمد لله،
مؤخرا اقتنعت بصعوبة أنه أبدا ما راح نلقا شخص مادخلش في علاقة و ماعندوش ماضي، و لأني شفت بزاف صديقات تزوجو عن حب و نوعا ما ندمو أو اختارو الشخص الخطأ، و أنا نحب نخمم بالمنطق قررت أنني نتزوج تقليدي بحكم أنو الحب و المشاعر راح تعميني
عن الشخص الصحيح و راح تخليني نتنازل على معايير مهمة في الزوج، استهلكت بزاف من محتوى " كيفية اختيار الشريك الصحيح" و تأثرت بزاف بفكرة المعايير...
المشكل أنه كل ما يتقدملي شخص نعاملو ك شريك مشروع و شغل راني ناناليزي ف سيفي نحكم ز
ورقة و ستيلو و نوازن السلبيات و الإيجابيات، معاملة خالية من المشاعر و الأحاسيس و في كل مرة ما نقتنعش بالشخص و نقول "لوكان يجيني شخص أفضل؟"
صحيح أنو حتى أنا مارانيش مثالية لكن مارهش عندي استحقاق و همي و مارانيش أصلا متأثرة بلي كوبل تاع السوشل ميديا، لكن مقبولة شكلا، متعلمة، و عندي بزاف نقاط إيجابية حابة نلقاها في شريكي لا أقل و لا أكثر...
دائما نلقا عيب مانقدرش نتقبلو...أقل مني في المستوى العلمي...مينداك المادي...أقل تديناا...فرق كبير في العمر...الخ، و مايبردش قلبي حتى نرفض و نعود ندخل في الدوامة تاع نتخيل الزوج اللي في راسي حتى يجي شخص آخر و نتصدم بالواقع و نتقلق و نرفضو ونعاود نولي للأحلام 🔄
و صراحة بدا يقلقني الأمر حاسة باللي ربما راني نراطي فرص و أشخاص مناسبين بهذا التفكير خصوصا أنو كل ما نكبرو كل ما يقلو الفرص الجميلة، وخطرات نقول لوكان راهو مكتوبي راهو يولي، و خطرات نقول ماراحش نتنازل على هذه المعايير يالوكان نبور ....
بانتلي أنو السلبية اللي في الزواج عن حب هي أيضا إيجابية، الشخص اللي يتنازل عن عيب في شريكه بحب راح يتصالح مع هذا العيب و يقدر يكمل معاه حياتو كامل، بينما في الزواج التقليدي مكانش مقابل لهذا التنازل ( مانعرف إذا فهمتوني؟؟؟)...
صراحة بدا يفقد الزواج في راسي الجمالية تاعو و راه ولا عفسة متعبة و فيها بزاف حسابات....و حاسة بلي ماراحش نقدر نمد الحب اللامشروط للشريك تاعي....و بديت أصلا نتخلا عن الفكرة هاذي...
هل أنا الوحيدة لي راني نحس هكا؟ هل المشكل في فكرة الزواج التقليدي ولا فيا؟ واش هو الحل؟