u/Advanced-Shower891

سؤال بجد والله، عشان انا كشخص بحب الافلام والمسلسلات، بستغرب جدًا لما بشوف ناس بتروح تتفرج على حاجات من أعماق الهاوية عشان يظهروا مثقفين ومحنكين افلام...الخ.

أصل ايه الهدف من أنك تتفرج على فيلم/مسلسل، محدش يعرف عنه حاجة وهو اصلا مش مسلي ومش بيشدك كمتابع ومش مخليك عايش الأحداث معاهم فعليًا... ليه تروح تتفرج عليه، ولا اقولك يا عمي اتفرج، بس متحشرهوش لينا وتبعد تعظّم فيه وتقول احسن عمل في الألفية ما قبل الميلاد ومش عارف ايه، وهو أصلًا مش محقق أبسط الأشياء اللي المفروض تتعمل عشان تجذب المتفرج، بعيدًا عن كونه فيه حبكة أو لا، ومفهوش أخطاء ولا لا، لأن كمخرج المفروض دا شيء مفروغ منه أنك تعمل تحفتك الفنية بشكل يليق أنه يظهر للعلن. ومش هذكر اسماء اعمال بصراحة تجنبًا للجدل، ولأن كل واحد ليه ذوقه الشخصي. انا عايز بي اعرف، ليه "مُحنكين السينما" مش بيتقبلو أن الشخص يكون عنده فيلم مفضل مش شرط يكون افجر عمل سينيمائي تم إنتاجه في 1970، بالعكس، ممكن يكون عمل عادي جدًا بس لمس شيء جواه أو حسسه بالأنتماء أو حتى خلاه يحبه طبيعي. ليه الناس بقت لازم تختار اكتر حاجة محنكة عشان تبان أن ليها رأي وبتفهم؟ مع أن دا مش مقياس اصلا.

وفي النهاية، كل الحب للجميع، وكنت حابب اعرف برضو ايه افلامكم المفضلة، يمكن الاقي حاجة اتابعها 🙏🏻

​

انا عندي صاحب انا وهو مقرّبين فشخ، بالرغم من أني نادرًا لما بخلي حد يبقا في المكانة دي (مش بقول كدا بدافع الغرور والله، بس أنا فعلا مبحبش اختلط بالناس وبتخنق وبزهق ومبحبش الحوارات اللي بتحصل بين الصحاب كل شوية وبحب اريح دماغي) بقالي سنة ونص او سنتين أعرفه وقرّبنا من بعض اوي لدرجة أن لو ناس نعرفها شافو حد فينا في الشارع بيسألوه عن التاني عشان طول الوقت مع بعض. واللي خلاني أقبل او مقاومش حوار أننا نبني صداقة ما بينا من الاول أصلاً هو اني كنت ببقا على طبيعتي وبرتاح في وجوده، بحيث اني ميبقاش مضطر افتح مواضيع وممكن نقعد ساكتين عادي محدش هيزهق، وبنحكي لبعض حاجات deep وبناخد رأي بعض وحاجات ال bestfriends دي كلها. المهم احنا لينا صاحب خلينا نسميه X. أنا أعرف X قبل ما اعرف صاحبي، وصاحبي نفس الكلام. لما اتعرفت على صاحبي، احنا التلاتة بقينا صحاب فشخ ومرتاحين وعلى طبيعتنا مع بعض. الفكرة أن X بيسافر كتير عشان شغله وبيرجع اجازات كل فترة يقعد كام يوم ويمشي. خدت بالي ويمكن اتأكدت اكتر من قريب، لما X نزل اجازة كالعادة واتجمعنا، أن صاحبي بحسه بيبعد عني أو بحس اني left behind لما X بيبقا متواجد. وعشان مكدبش الموضوع نفسه مضايقني بس مش الشخص لأنه صاحبي ومبحقدش عليه بالعكس، بس الفكرة في "التقدير" نفسه. الموضوع دا كان بيحصل مع صاحبي وكان بيحس بنفس الحاجة لما كان متصاحب على حد قبل ما يعرفني، وحاليًا هو بيكرر معايا نفس الحاجة اللي حصلتله، وأنا بطبعي مبحبش وجع الدماغ وان كل شوية أعاتب حد على حاجة عملها، عشان في الطبيعي اول ما بحس أن فيه حاجة هتعكر مزاجي أو هتوجع دماغي، بقلب أو بمشي على طول وبختار دائمًا اني اكون لوحدي. الفكرة اني معرفش اتصرف ازاي، لأنه أغلب الوقت بيرن عليا لما ميكونش متواجد مع X، او لما يكون X دا مش فاضي، وحتى واحنا التلاتة متجمعين أغلب الحاجات بيعملوها هما الاتنين وأنا بحس اني اترميت ورا، عشان كدا اول لحظة حسيت فيها بالإحساس دا كنت بتجنب اني افضل متواجد دايمًا أول ما X ينزل اجازة، بس طبعًا بنتجمع بحكم أننا "أصحاب مقرّبين" ولما X بيسافر تاني بيرجع هو يهتم اكتر ونقعد مع بعض وقت اكبر ومبيجيليش احساس اني left behind. مش عارف اكلم صاحبي في الموضوع دا، ولا هجيب لنفسي وجع دماغ اكتر وهيفهم غلط او ممكن يفهم اني بحقد على X ودي مش الحقيقة لأني عمري ما اتمنى لحد حاجة لأنها مش مستاهلة. كنت بفكر اني أبعد عنه من سكات، بس برضو بقول عيب دا مهما كان عشرة واللي بينا مش قليل عشان اعمل معاه كدا.