اندعمت وانا سيارتي واقفة وانقلب الموضوع علي، شالحل؟
اليوم وانا واقفة بالسيارة ناطرة دور على دخلة مصافط واحد من المجمعات (خطين تحت واقفة يعني السيارة نهائيا ما تحركت) وانا سرحانة ما كنت منتبهه ولا تدعمني سيارة من اليسار دعمة بسيطة صوب باب السايق. طقيت هرن وطقيت اشارة ولاحظت الي دعمني جنه كان يبي ينحاش بس شافني وراه وراه ف صفط (او صفطت لأن طلعت بنت) المهم انا خذيت نفس عميق وقررت انزل أتحمد لها بالسلامة واقولها حصل خير واتأكد من وضع سيارتي وسيارتها واقولها اذا في اي ضرر السيارة عليها تأمين وجذي.. نزلت وقبل لا اقول اي شي جان تسألني "انتي دعمتي الجام بس؟" عفوا؟ منو دعم منو؟ شلون أنا دعمت وانا واقفة مالي شغل بأحد؟ قلت لها انا ما دعمتج انتي داعمتني هني طلع اسلوب الشوارع مالها. قالتلي لا الطريج طريجي وانتي مو شايفتني و كل هالمناظر الي مركبتهم ما تشوفين وحمدي ربج وووو..؟؟؟ أنا من الصدمة حتى ما عرفت شقولها ولا استوعبت يا جماعة اهي داعمتني وقعدت تغلط بحقي شنو قعد يصير؟ وانا كوني اول شي مو مستوعبة شلون قلبت علي الموضوع ثاني شي مو راعية مشاكل طليت طلة على المكان الي اهي داعمته وشفت بس المنظرة اليسار تصفّطت ف عدلتها ومشيت خليتها. لما خلصت من مشواري وشفت سيارتي واقفة استوعبت ان الصوب الثاني (الي اهو اليمين) متعور شوي وأظن لأن لما اندعمت من اليسار سيارتي تحركت شوي لي اليمين وطقت رصيف. الحين انا خليت الاخت تمشي بس خذيت رقم لوحتها، مادري يسوى اروح اشتكي ولا ما يسوى. السيارة الي الحين عندي بديلة لأن قبل اسبوع بس داعمني باص والشركة مبلغتني اذا طلعتي ضد مجهول راح تدفعين نص مبلغ التصليح وانا ادري لو اسوي جذي راح يطلع مبلغ بسيط بس والله قهر انا اندعم وانا ادفع ليش؟ لا وفوق هذا قطت علي كلام وغلطت بحقي ومشت استغفرالله العظيم بس صارلي ٣ ساعات أتحسب عليها. شنو رأيكم بالموضوع شنو احسن شي ممكن اسويه؟ والسموحة على الطوالة
ps: خلاصة الموضوع ركبوا داش كام لأن الميانين بالشارع كثرانين