اللي يوقفون على طرف الشارع و يدور حد يوصله جدام توقفون لهم؟
السلام عليكم اخواني و خواتي
سالفة قصيرة بس مع الفضفضة استوت طويله 😅
إذا تبون TLDR للموضوع خبروني بكتبه عقب تحت
بعض الأحيان على طرف الشارع يمكن تشوف عامل او حد من المحتاجين .. يدور على حد يوقف له و يوصله جدام ..
و ساعات ، خاصة يوم الجو حار الصراحه اوقف لهم و اوصلهم جدام او حتى المكان المعين اللي يبغي يوصل له (إذا ما في حد وياي في السيارة ، و ما عندي شغله في وقتها)
و طبعاً ضرب سوالف وياهم في السيارة ، و اغير لهم الجو شوي باختياري المميز للأغاني 🤣 .. مرة حتى عزمت واحد على Cold Brew من ستاربكس (drive thru) تم يمدحه و يقول انه لذيذ بس ما خلصه ف احس انه كان يجامل
ف استانس وياهم .. و مب مذله بالنسبة لي لو تاخذ الموضوع بقلب صافي .. لو بين كل فتره و فتره
لكن مرة كنت ويا حد من الشباب، و شفنا واحد من المحتاجين اللي يدور له حد يوصله جدام.. قلت حق ربيعي بنوقف له
قالي 'كمل كمل.. لا تكون غبي'
قلت له 'ليش؟ ما فيها شي .. ترا بنوصله جدام و بنحصل اجر بالمرة'
قالي 'لو هذا شخص مجرم او مطلوب من الشرطة.. و وقفوك او عنده '**مخدات**'' الخخخخ من الأسباب اللي ما تخلص.
و خلاني أفكر الصراحه.. هل هذا شي غلط و غبي الواحد يسويه فعلاً؟ و تطيح في مشكلة انت في غنى عنها
او ربيعي بالغ في الموضوع و بالعكس الواحد يسوي خير ؟
يكسرون بخاطري الصراحه ..
سامحوني على المثل المبالغ .. بس ساعات يكونون شياب و احط في بالي لو يدي كان في هالموقف ، هل برضى يمشي في الحر و يهلك؟
ابغي اسمع رايكم.. لانه آخر فترة يوم اشوف حد على طرف الشارع أتردد اوقف له و ادخل عمري بمشاكل
للعلم ؛ اللي أشوفهم عادةً يكونون في مناطق بعيدة و مقطوعه.. مثل مرغم — و ساعات على طريج حتا في لهباب ، لكن لهباب مثل ما تعرفون الحين فيه زحمة نوعاً ما، و عادي حد ثاني يوقف له.. اماً في مرغم نادر حد ثاني بيوقف لهم..
و والله .. سامحوني بس هم اغبياءءء (استغفر الله)
دوم من ضمن السوالف اسألهم ليش يمشون في عز الحر
و يجاوبون 'والله ادور لي شغل ..' او 'رايح اشتري اغراض حق السكن'
و في بالي أفكر انزين هذي الاغراض ما تقدر تاخذها وقت العصر او المغرب مثلاً يوم الجو شوي أهون؟ او يمكن تدور لك محل اقرب للسكن؟ (في محلات اقرب عليهم ..)
و ما حصلت تدور لك شغلة غير عن ٦ ساعات ساير و ٦ ساعات راد في نص البر مشي كل يوم من السكن؟
ادري انهم مساكين و والله ما ألومهم الله يعينهم يا رب و ييسر امورهم دوم ادعي لهم
بس بعد الواحد يفكر بالعقل اللي الله عطاه .. الجسم فعلاً ما يستحمل انه يمشي بهالحر خاصة وقت الظهر و عادةً بلا ماي و طبعاً بلا مكان انه ياخذ استراحة لو تعب..