دائما نسمع احد مبررات تأخير الزواج هو "بعدني ما كونت نفسي" بالنسبة لكم، ماهو تعريفكم لتكوين النفس؟ هل هي الدراسة؟ الراتب و المنصب؟ الجاهزية لتحمل المسؤولية؟ اشياء اخرى؟
المغزى من الموضوع ليس الزواج بحد ذاته، بل كيف يعرف الشخص “أنه أصبح جاهزًا للحياة” أو أنه وصل لمرحلة يشعر فيها بالاستقرار والنضج الكافي لاتخاذ قرارات كبيرة مثل الزواج او غيره.
احب اسمع شو هو تعريفكم لتكوين النفس و متى بتحسون انكم جاهزين؟
السلام عليكم، الموضوع هذا استوى أمس و لين الحين أنا في صدمة الصراحة. عندي ربيع خلنا نسميه "ع"، تقريبًا أعرفه من 6 سنين أو يمكن أكثر بشوي. المهم صاحبنا هذا تصرفاته دوم كانت عادية جدًا، بس فيه شوية حركات أنثوية بسيطة، يعني مثلًا يهتم بعمره وايد، يعدل حوايبه شوي، يحط كريمات، وطريقة كلامه أحيانًا فيها دلع خفيف، بس بشكل عام شكله وتصرفاته شرات أي ريال طبيعي.
المهم البارحة كنت طالع مطعم ويا ربيع ثاني، والمطعم هذا يلساته وايد ضيقة وكل حد تقريبًا عدال الثاني (مطعم الستيك المشهور اللي فدبي إذا تعرفونه). المهم شفته هناك ويا شخص ثاني، ويلست وراه بدون ما ينتبه علي لأنه كان معطيني ظهره.
وأنا يالس أسمعه يسولف ويا "ربيعه" اللي جدامه، الصراحة الكلام اللي يقوله موووول مب كلام ينقال بين ريال و ريال. كله "أحبك" و"فديتك" و"ابا اتم وياك" وكلام ثاني الصراحة ما أبغي أذكره. وكل ما سمعت أكثر كل ما استوعبت إن الموضوع صدق و مب مصخرة.
المهم خلصنا وطلعنا وهو أصلًا ما انتبه إني كنت موجود. ومن أمس لين الحين وأنا مب مستوعب الصراحة. يعني ولا مرة شكيت فيه بهالطريقة، صح كانت عليه شوية حركات بسيطة بس أبد ما توقعت يوصل لهالشي، خصوصًا إنه كان وايد close وياي و سافرنا كم مرة ويا بعض و ولا مرة استوى شي غريب من بينا.
الحين مادري شو أسوي الصراحة، هل أتعامل عادي كأنه ما استوى شي وأنسى الموضوع؟ ولا أكلمه بطريقة غير مباشرة؟ ولا ابتعد شوي شوي لين ما تنقطع العلاقة؟ لا تقولولي انصحه لانه انا مول مب مال نصيحة، ولا حتى اعرف كيف انصحه.