تجاربي و كلام عن الزواج الصوري (لافندر)
مرحبا يا جماعة، يعطيكم العافية، كيفكم وكيف صحتكم؟ إن شاء الله كلكم تمام؟
بدي أحكي شغلة من البداية: بعرف إنه كلامي ممكن يضايق بعض الناس أو يخلّي في ناس يحسوا بعدم الارتياح، بس بصراحة حاب أحكي رأيي واعتبروه رأي شخصي، نصيحة، أو اللي بدكم ياه
أنا واحد من الناس اللي نفسي أتجوز وأكون بعلاقة مع شريكة تريحني نفسياً، وتكون هي كمان مرتاحة، بس المشكلة إني لاديني/ملحد،ط وصعب أكون مع وحدة مسلمة وأضحك عليها أو أمثل لأني ما بحب الكذب، وما برتاح لجو “صلّي وصوم” وكل هالحكي
بصراحة أنا مش ضد فكرة الزواج الصوري وبالفترة الأخيرة صرت أفكر فيها أكثر، يعني حكيت مع بنات على كذا تطبيق، بس أغلبهم كان بدهم الشب يعمل كل إشي من الألف للياء، مثل مصاري، ذهب، طلعات…الخ لدرجة حسّيت حالي مضغوط كثير
طيب اسمحولي أحكي بصراحة: اللي بدها زواج صوري، ليش بدها الشب يتحمل كل إشي وهي بس تكون مبسوطة وتصرف وتعيش على حسابه؟ إذا هو زواج صوري، المفروض يكون في نوع من التفاهم والتوازن، مش طرف يعطي كل إشي والطرف الثاني بس ياخذ
خلينا نكون واضحين، الزواج الصوري فيه جزء من الكذب (إخفاء الحقيقة) عن الأهل، سواء من طرف واحد أو الاثنين، و كونه اثنيناتكم بدكم هاد الأشي فليش ما تشتغلوا عليه مع بعض؟؟؟
و رح تيجيكم أسئلة مثل: وين اولادكم؟ ومتى بدكم تخلفوا؟
وكمان إذا مفكرين إنكم تطلعوا بره، طيب وين بدكم تروحوا؟ ومين اللي رح يتحمل المصاريف؟ و مين اللي رح يجمع المصاري؟
وبالنسبة للشباب: إذا أنت داخل بزواج صوري، والبنت من البداية واضحة معك إنه العلاقة شكلية (صوريه) وإنه ممكن تطلع وتصاحب غيرك سواء شب او بنت، فلا تزعل بعدين اوك؟ أنت وافقت على هاد الأشي من الأول، فلا تيجي بعدين تعمل مشاكل أو تتفلسف بالحكي
اللي بحب يحكي هي المكان مكانك، و اللي مش عاجبه كلامي هيني هون موجود و برد اهلا و سهلا