عملت الف جنيه في اربع ساعات
دا بوست متاخد كوبي من الفيسبوك ، حد يعرفنا التفاصيل وازاي نوصل للشغل دا
حابب اتكلم عن فتره عيشتها كانت حلوه ماديا لكن مهلكه نفسيا
السنه إلى فاتت اتعرفت على جروبات خاصه على الواتساب بيتجمع فيها شغل الجامعات للخليج كله ، كل دوله عربيه فى شبه الجزيره عملتها أعلى من عمله مصر خصوصا السعوديه ، قطر ، البحرين ، الكويت
مصروف الطالب هناك اليومى يساوى هنا فى مصر رقم و رقم كويس جدااا
وده خلق سوق سوده فى التعليم عندهم والمصريين هما إلى بيدورا السوق السوده دى و أوقات برضه شباب من اليمن لكن بتوع اليمن فى الغالب بيكونوا سماسره لكن المصريين سماسره و متخصصين
الطالب من دول يدخل الجامعه وهو مش محتاج تعليم اصلا ، معاه فلوس لا تعد ولا تحصى ، التعليم بالنسباله مجرد وسيله يتعرف فيها على أولاد البشوات إلى زيه ، يعمل علاقات ، يستمتع بحياته الجامعيه كتجربه حاجه جديده فى حياته
المهم الطالب ده لما ينطلب منه تاسك أو واجب أو مشروع يدخل على السمسار يبعتله الفيلات بتاعته و يعرفه المطلوب و السمسار يدخل على الجروبات يقول الى عنده واحنا ندخل نكلم السمسار
السمسار يتفق مع كل واحد على سعر و بعد كده يشوف أقلهم سعر و يشتغل معاه ويبعتله الشغل
الطالب المصرى يحل و ياخد فلوسه زى ما اتفق و السمسار ياخد نسبته و الشغل انبعت للطالب الخليجى وهكذا طول العام الدراسى
الموضوع بيوصل ساعات أن الطالب الخليجى مش عارف يشتغل على برنامج الورد ، فى مره انا واحد بعتلى بدى إيف عايز يشيل اسم واحد زميله واحط اسم و رقم واحد تانى مكانه ، تخيل حتى دى مش عارف يعملها فى اليوم ده انا فاكر كنا بعد الفجر عدلت الاسم فى ربع ساعه و أخدت حوالى ١٠٠ أو ١٥٠ جنيه
طبعا المفروض ده يخلق أزمه تعليميه اصلا عندهم و إداره الجامعات و الدكاتره بديهى تلاحظ حاجه زى دى
الصدمه أن فيه دكاتره أصلا من المنظومه الجامعيه هى كمان فى الجروبات دى بل بعضهم بيتم تحضير ليه الدكتوراه من دكاتره مصريين بالفلوس و فلوس خياليه
فالدكتور اصلا بيعمل زى الطالب فأكيد مش هيدقق عليه
عايز أقولك الاشد من كده
أن فيه دول فيها جامعات أمريكيه فى الخليج و الجامعات دى شديده جداااااا فى المواضيع دى و الغلطه بفوره
تخيل يا عزيزى المصريين يعملوا ايه ؟؟!
المصريين نزلوا البرامج الدراسيه بتاعت الجامعه الامريكيه كلها وبقى المصريين عاملين معاهد الكترونيه خاصه فقط للجامعات الامريكيه و الاجنبيه الموجوده فى الخليج ومعهد خاص لكل جامعه امريكيه فى الخليج الامريكيه مثلا إلى فى الكويت غير البحرين كل جامعه ليها معهد فى مصر
وبقى طلاب الجامعات دى شغلهم شغل مخصوص مينفعش حد تانى ياخده سواء سمسار أو أى حد يشتغل فيه
الفرق بين شغل الطلاب العادى فى الجامعات العاديه و بين الجامعات الاجنبيه دى زى الفرق بين قسم الشرطه العادى و الأمن الوطنى حرفيا لأن عندهم وسائل كشف متقدمه جدا لو حد وقع وفلتت منه معناه أن النظام التعليمى مخترق و بكده الجامعه تغير نظامها والطالب يتحقق معاه ممكن يتفصل وده أقل السوء و الأغلب سجن
( تخيل ده يحصل لو الواجب بتاعه انكشف أنه مغشوش )
المهم الطالب بتاع الجامعه الامريكيه ده أول ما بيدخل الجامعه دى
من أول يوم بيكون معاه المعهد ده من أول يوم إلى أن يتخرج
، فى مره تواصلت مع شخص شغال مع طالب فى التخرج
قالى انا معاه يوم بيوم خصوصا فى سنه التخرج
كل يوم اكون معاه وابعتله الفيلات والملاحظات واعرفه هيدخل المعمل يعمل اى ولو فيه شغل يدوى ممكن أوفره ليه من هناك
بيكون معاه من أول يوم لغايه ما ياخد شهاده التخرج
طبعا مش عايز اقولك الاسعار أيه فى الحاله دى فى ناس بتوصل لاكتر من ٣٠ ألف فى الشهر وده من طالب واحد بس ، فيه معيدين مصريين سابوا الجامعات والتدريس وبقى ده شغلهم ودخلهم و حياتهم
أذكر فى مره واحد اتواصل معايا عايز حل امتحان انا ظنيته معاه نموذج امتحان عايزنى أحله عشان يتأكد من حله صح ولا غلط
لقيته بيقولى لا انا عندى امتحان عايزك معايا الساعه كذا اون لاين وانا فى اللجنه هبعتلك الامتحان وتحله وتبعته ليا ساعه ونص ب ٨٠٠ ريال وكان بيضغط عليا وعايز يوصلهم ١٠٠٠ عشان اوافق
افتكر أنى فى أول يوم شغل ليا فى الحوارات دى وكان معايا سمسار يمنى أول يوم تقريبا عملت ٩٠٠ جنيه فى أربع ساعات فقط
بل العجيب كمان فى بعض الدول غير السعوديه طلاب كليات الشريعه الاسلاميه هما كمان نفس الكلام
فى مره اتبعتلى مطول من المطولات والدكتور عايز منهم بحث فى نقطه معينه ، الطلبه مش عارفين حتى مكان الموضوع فين فى مجلدات الكتاب ولا فى اهنى بابا او اى جزء من الكتاب
بصراحه عشت وقتها فتره رخاء ماديا لكن كنت هتجنن حرفيا
الفلوس كتير وكل ما انت قاعد على الواتساب فيه شغل بينزل وكل ما تخلص شغل وتاخد فلوسه وتيجى تنام تقول وانام ليه ما اشتغل كمان وأجيب فلوس تانى ، ف اشتغل واخلص وأجى انام اقول طب ما اشتغل تانى الفلوس حلوه وهكذا كل ما قعدت كل ما جبت فلوس
حرفيا مكنتش بقوم من على الواتس ولا من قدام الاب توب ، وبدأت اتعب جدااا فوق ما أى حد ممكن يتخيل ، ممكن أنام فى اليوم ساعتين فقط لانى بقيت مستخسر أنام وأسيب الفلوس دى كلها ، لحد ما لقيت أنى اصلا مش عارف اصرف الفلوس إلى بكسبها ، مبقاش ليها قيمه ، الفلوس موجوده بس مش بصرف ولا انا سامح لنفسى أنى ألاقى وقت اصرف فيها الفلوس
لحد ما بقيت بنهار
لقيت أنى هضيع نفسى ولقيت أنى الصح أنى اسيب الكلام ده
وبدات احاسب نفسى أن معظم الفلوس دى حرام لان الطلبه دى مش بتذاكر وانا الى بحل ليهم الواجبات بتاعتهم
لكن بعد كده بدأت ألاقى أن فيه شغل حلال وهو فقط تقديم الخدمات المشروعه ، يعنى تاخد طالب تشرحله محاضرات زى الدروس الخصوصيه تكون معاه من أول الترم ، أو طالب داخل على امتحان وعايز حد يراجعله المنهح وهكذا
وده طبعا قليل جدا جدا جدا الشغل الحلال قليل والفلوس بدأت تقل تدريجى و اصلا النقطه الحلال دى صعبه لان لو شغل الشرح ده حالك من سمسار السمسار لازم يحدد وقت على كيفه أو كيف الطالب ولازم يكون معاك اون لاين فى المحاضره و يسمعها وممنوع تتواصل مع الطالب على انفراد خوفا من انك تاخد الطالب وتخلع بيه وتسيب السمسار ، يعنى لو فى يوم السمسار مش موجود او مش فاضل يبقى المحاضره ملغيه ، كدا كدا أنت متعرفش تتواصل مع الطالب إلا من خلال السمسار
صراحه التجربه دى علمتنى درس كويس لان كان المال عندى غايه وليس وسيله ، بصراحه بعد التجربه دى عرفت أن المال بعد حد معين بيبقى مقرف وملوش أى قيمه ، صحيح دلوقتى انا مفلس لكن برضه لسه عندى القناعه دى ومن وقتها الحمد لله والله مفيش أى مال مهما كان حجمه أو كميته ممكن يتغرينى ولا عمرى بعد التجربه دى انبهرت بثراء حد مهما بقى معاه فلوس خصوصا أنى علاقتى بناس مرتاحه ماديا كتير جداا سواء اكبر منى أو أصغر ، حرفيا الشهوه دى عندى تم استئصالها بعد اللى حصل معايا لان المال فى الفتره دى كان مستعبدنى حرفيا
اخر يوم شغل ليا فى القرف ده وانا كنت منهك وجسمى متكسر من قله النوم و العرق بينزل ، وعينى حمرا وكنت بحب أسيب الفلوس على المكتب قدامى وانا بشتغل عشان تحفزنى اجيب غيرها و الورق كتير و مغرى ، مره واحده لما بصيت على حالى وشكلى وجسمى إللى خس ، لا إراديا تفيت على الفلوس
انا قاعد اجمع فيها و اصلا مش مدى نفسى مجال أنى انبسط بيها ، ولا عارف هصرف كل ده فين اصلا وانا مش محتاج حاجه اساسا
وقتها فهمت أن الفلوس دى امر عادى و زيها زى الاكل
إللة أكل جبنه حادقه بعيش وملى معدته إحساسه بالشبع نفس إحساس اللى أكل خروف و الاتنين شبعوا فى النهايه
وكان أكتر حاجه بينت ليا أن ده حرام حتى لو كنت بجتنب الحاجات الكبيره زى إنى ادخل مع حد الامتحان ، أنى لما نويت ما احلش لحد حاجه و اشترط أن إلى عايزنى احلله حاجه لازم اشرحله و أفهمه ولقيت رفض تام عرفت أن الموضوع كله شمال فى شمال وحرام ، و الجروبات دى الحلال فيها قليل أوى أوى أوى
النقطه الاخيره
الخليج كله بيعانى اصلا من المشكله دى خصوصا فى بيئه العمل
لذلك عمره ما هيحصل أن هيكون فيه إستغناء عن المصريين مهما حصل و مهما اتقدموا وعملوا جامعات على أعلى مستوى هيفضل المصرى خريج معهد سنتين أعلى من أى شخص ممكن جامعات الخليج تخرجه