u/imurperfection

طبعاً فتحت هذا الحساب لان قبل جنت افضفض لai بعدين ادركت من افضفض اله اكتئب بالزايد لان بنص الحجي تدرك انو انت اصلا ماكاعد تشكي لانسان واقعي حتى

وهذا الشي يزيد الاكتئاب ( بالنسبة الي )

الصراحه هذا الحجي الي راح احجيه صعب عليه كلش لان اكو كلام من تحجيه تحسه يطلعك مثير للشفقه وضعيف وانا ماحب هيج شعور بس مرات المشكله تطلع من ايدك وحتى الدعاء ماجاي يفيد او ماعرف اذا جاي يفيد او لا ماجاي اشوف تحسن..

بكل بساطه الفراغ وعدم الاكتفاء كاتلني كلش

من ناحية الاصدقاء من الابتدائيه لحد هسه يعني لازم اكو صديق احس اكو خلل يعني ماحسيت انو فعلا صديقي

يمكن جان اكو ثنين يعني عدد قليل جانو زينين حتى لا اظلم احد

بس صعب من شخص عقله يركز عالشغله السلبيه كوه

شغلة الاصدقاء شويه معقده بالنسبه اليه

من اكص صور ويه اصدقائي وانشرها ستوري واحط منشن والناس تشوف عندي اصدقاء هذا الشي يرضيني

واغار كلش من اشوف اصدقاء حلوين سويه

واغار هواي من اشوفهم يطلعون سوه لمختلف الاماكن بينما انا لو مايقبلون اهلي لو يتعاجزون

الناس بالنسبه الي شي معقد

بصراحه يعني بالجامعه اتمنى اعرف شنو افكار الناس عني من يشوفوني

شنو الخلل بيه ليش محد يتقرب هلكد مرات حتى من اتقرب انا ماحس احد يستقبلني او يريدني او اعجبه

يعني ماحس اكو احد يريدني فعلاً

هو المفروض ماركز عالشي السلبي هذا الاحسن بس عقلي ماكدر اتحكم بي هواي تعبني

هذا الشي انا كل يوم افكر بي هاي الجريده هذا الكلام كله انا كل يوم افكر بيه احلله وحتى من اكول الكه حل يعني شنو الحل؟ كلشي بيدي سويته مثلا مظهر مثلا اسلوب اسلوبي مو بذاك السوء صح انا شخصيه بارده بس مو لدرجه ماينطلع بي حتى

بس اضل او يمكن بالاصح عقلي يسألني يكلي ليش محد يريدج ليش محد يصادقج ليش خاف وجهج مو حلو؟ خاف ملابسج مو حلوه؟

هواي يسألني عقلي هواي وانا ماعندي جواب اله

ماعندي اي جواب

ماعرف الجواب شنو اصلاً

من ناحية العلاقات العاطفيه

لا اب ولا اخ جبير ولا عم ولا خال ولا ابن خال ولا ابن عم و لا ابن صديق و لا صديق بنفسه

ماعندي رجال بحياتي يحسسني بالحب

من اشوف بنيه عدها رجال يحبها اغار هواي

ذيج المره حتى حلمت بالموضوع ، حلمت بشخص جان يلوح وعبالي يلوح الي واجيت الوح مدري شنو وبعدين طلع يلوح للبنيه الوراي وحسيت بخيبة امل.. يمكن هذا الحلم يوفي شرح الحاله المثيره للشفقه

عقلي يسألني

يكلي ليش مو علاقاتنه ناجحه ؟ ليش غيرنا عده الي نريده احنا واحنا لا ؟ ماسوينا شي خطأ ولا مظهرنا خطأ ولا شخصيتنا هيج مزعجه؟ ليش؟ممكن اعرف ليش؟

يسألني عقلي وهم ماعرف اجاوب ، ماعندي جواب

ادعي الله يرزقني بس هم ماكو رد ، عشر اشهر ويمكن اكثر

ماريد اتحمل اكثر

انا اريد انحب من قبل رجال يعجبني ، احتاج هذا الشي بس محد يسمعني ولا جاي يصير الي اريده حتى

تحسسني بحيره ماعرف الخطأ وين

اتمنى من الله يحققلي امنيه هواي ادعيه ومن احجي يكلك يمكن مأخر الشغله لان انت ماناضج، كل عقلك؟ انا ماناضج؟ حتى لو جنت فعلاً ماناضج انا اريد انحب، انا كلش متعطش للحب

تعطشي للحب هواي يوجعني ويأذيني ويقهرني ويحز بخاطري وحتى الله حزة خاطري يجوز مو بعينه

كلما يمر على بالي هيج مواضيع تبجيني

يكلك لا تنتظر احد يحبك حب نفسك ؟ ليش حبي لنفسي كافي؟ مو كافي هذا الواقع لهذا السبب اريد شخص يحبني

اريد واحد يعجبني يحبني

اريد احس بالاكتفاء وعدم الفراغ

اريد اكتفي بشخص

اريد اجرب يكون عندي شخص يحبني ويملي عيني بحيث من امشي بين الناس ماهتم يحبوني لو لا لان انا مكتفي بشخص حبه ماليني

صراحه راجدي ابوي حاز بخاطري، علاقة البنات الزينه ويه ابائهن و قريبه منهم و يدلعها بشكل مباشر هواي تحز بخاطري

اتمنى صدك يجيني رجال يملي عيني ويحسسني بحب يفيض

الموضوع هواي مأذيني وتعبت من التفكير بي

حتى الحجي عن الموضوع تعبني

اريد اكول هاي اخر مره احجي بيها عن هذا الموضوع

بس مرات كدما تحز بخاطري ارجع احجي

اريد اعرف ليش محد يختارني

ليش؟ عقلي هم يرجع يسأل

وهم ماعندي جواب

اعتذز لعقلي لان ماعندي جواب واعتذر لنفسي لان حبي الها ماجاي يكفيها