عقب ما اتعرف على شخص لمده معينه، اعرفه في البداية بشكل سطحي وما احس بتهديد، لكن من يصير الشخص يومي او ابتدي اتعلق او احس بمشاعر ليه، كانه مخييي يبتدي يحميني كانه يقول في خطر اتباعديي!!! (يتعبنيي دا الشي عدل)
وصرت اذا اجوف هالشخص ما استانس بالعكس اقعد طول الوقت افكر هل قاعد يجذب هل قاعد يسوي شيي، هل عنده نيه ثانيه، لان كنت قاعده اعيش مع شخص ٢٤ ساعة وقدر يجذب علي ويعطيني اهتمام في نفس الوقت، فهل هذا الشخص الجديد صدق يحبني؟
اني مشاعري مو باردة! بالعكس احب اعطي احب اعبر، لكني من اتقرب من شخص كفاية لان عندي احتياج للعاطفة عقب اهرب خوفاً من ان انكسر (مخي دائماً في protective mode)
وهاي المشكلة مو بس مع العلاقات حتى مع الاصدقاء، كله احس بالتهديد لدرجة في النهايه اني الي اتباعد من نفسي عشان احمي روحي من خطر غالباً مو حقيقي.
المشكلة ما اسوي هذا الشي بوعي ولا اسويه عن عمد، بروحه يصير ويتعبنيي عدل في كل المراحل، مراحل اني ابتدي اشكك في الشخص ومراحل واني ابتعد، الشي عدللل يقتلني!!!
واحسني عشان جي قمت اتجهه احياناً حق الرجال الغير متوفرين اصلاً ما احس العلاقة بتوصل لمرحلة عميقة لدرجة بفتح فيها قلبي، يعني كانه في مسافة امان عشان احمي روحي من صدمه جديدة.
صرت لسبب ما احب شعور التوتر والانتظار (يعور عدلل ويتعب بس احبه ادخل روحي في اشياء ما ابيها بس عشان يجيني الشعور والشعور بالخطر)
والي مخي مو قاعد يستوعبه يفرق بين الحب والاثاره. كانه صدق ما ارتاح اذا الشخص طبيعي .
في النهايه صدق غريب شلون صدمه علاقة ما استمرت الا سنه تلعب في المخ وتغير كلشي!
ما عندي حل حرفياً
لا تقولون علاج نفسي، مافي فلوس
حلي الوحيد اتباعد عن الرجال واكفيهم شري.
هل في احد مر في تجربة مشابهه؟ وشلون تخطيتونها؟