u/URS8

يا جماعة الخير، ودي أفضفض لكم وأخذ شوركم في موضوع متعبني نفسياً. عندي "صاحب" مزحه يتعدى كل الحدود، والمشكلة ما أشوفه مزح كثر ما هو استنقاص وإهانة.

​أنا شخص هادي وفي حالي، وكنت أمشي الأمور على قد نيتي، بس اكتشفت مع الوقت إنه ماخذني "محتوى" يضحك الربع علي. يفتش جوالي، يفتش سيارتي، لدرجة إنه مرة صب موية وصابون في أرضية سيارتي وحاسها علي! وبالمقابل لو طلبت أركب سيارته يرفض، وإذا ساق سيارتي يزعجني وهو يسوق وما يرفق بالموتر.

​تخيلوا بعد الكرم والعزائم في بيتي وفي الاستراحات، يقول لي بوجهي: "حنا مو شايفينك شيء"! ودايم يفتح مواقف قديمة انتهت بس عشان يضحك الناس علي، وإذا تضايقت قلب السالفة وقال "أنت النفسية وأنت السبب".

​الصراحة يا ربع، دخلت في دوامة اكتئاب وصداع بسببه، وصرت لما أرجع البيت أنهار نفسياً من كثر القهر. اكتشفت مؤخراً إن له سلوكيات وتصرفات سيئة، وأحس إنه يفرغ نقصه وأمراضه فيني لأني محترم وهادي.

​أنا الحين قررت كذا حاجة وأبي رايكم:

​قطعت عنه لي 11 شهر، وأفكر أخلي القطاعة نهائية ولا عاد يشوف رقعة وجهي.

​نويت أدخل نادي وأعضل وأتعلم فنون قتالية، مو عشان أضارب، بس عشان أبني ثقة في نفسي وما عاد أسمح لأي أحد يتجرأ علي أو يلمس ممتلكاتي.

​وش رايكم؟ هل اللي أسويه صح؟ وكيف أتخلص من التفكير فيهم وفي حركاتهم اللي للحين لاصقة بمخي؟