u/Ok-DRAMAA

​

أتمنى البوست يتقري بهدوء، ولو في اختلاف يبقى في إطار نقاش قائم علي اننا نسمع فيه بعض ونحترم بعض.♥️

من خلال شغلي مؤخرًا كمعلم ومدرب أطفال، واحتكاكي المباشر بيهم في المدارس، بقيت أسمع منهم كلام كتير مه (خصوصًا لما بيتوفر لهم مساحة آمنة يتكلموا فيها بدون خوف.)

من أكتر الحاجات اللي لاحظتها، إن في نسبة كبيرة من الأهالي بدون قصد بيتعاملوا مع الطفل كأنه أكبر من سنه.

طفل عنده 10 سنين بيتطلب منه تصرفات ووعي أقرب لشخص بالغ، وده بيحط عليه ضغط نفسي مش بسيط.

(عدم الوعي و التفرقة في التعامل)

كمان بتتكرر جُمل زي:

"إحنا بنتعب وبنشتغل وأنتم مش حاسين بقيمة الفلوس"

ومع الوقت، الموضوع ممكن يتحول لشكل من أشكال المعايرة، حتى لو كان الهدف منه التربية أو التوضيح.

في رأيي، الطفل في المرحلة دي محتاج دعم وفهم أكتر من اننا نذكر الطفل بالمسؤوليات اللي هي في الأساس دور الأهل، لحد ما يكبر ويكون قادر يتحملها بنفسه.

نقطة تانية مهمة🚨، وهي مشاركة بعض الأهل لمشاكلهم الشخصية أو خلافاتهم قدام الطفل.

رغم إن النية ممكن تكون طيبة، لكن ده أحيانًا بيحط الطفل في موقف أكبر من قدرته على الاستيعاب، وبيكوّن عنده مشاعر سلبية أو انطباعات مش واضحة المصدر.

الفكرة مش لوم أو انتقاد، لكن محاولة نفهم تأثير بعض السلوكيات على المدى الطويل.

الطفل مش مفروض يشيل ضغوط مش مناسبة لسنه، ولا يعيش دور مش دوره.

ببساطة

كل ما كانت طفولة الإنسان أكثر توازنًا وهدوءًا، كل ما كانت شخصيته في المستقبل أكثر استقرارًا. ♥️

​

إحنا وصلنا لمرحلة إن مجرد المشي في شوارع أسيوط، أو في أي شارع عموماً، بقى بيمثل عبء نفسي وعصبي كبير. ظاهرة التسكع ووقفة الشباب على النواصي وفي الشوارع مابقتش مجرد تضييع وقت، دي بقت مصدر أذى صريح وتعدي على حرية الناس.

مفيش بنت أو ست بتعدي في الشارع إلا ولازم تتعرض لمضايقة، كلمة سخيفة، أو نظرات وقحة من شباب كل شغلهم الشاغل إنهم مايسيبوش حد في حاله.

تخيل تكون ماشي مع زوجتك، أختك، أو والدتك، وتتعرض للموقف المهين ده. اللحظة دي بتتحول لقنبلة موقوتة؛ يا إما تكتم غضبك وقهرتك عشان تتجنب المشاكل وتمشي اليوم، يا إما تتصرف بطبيعتك وتدافع عن كرامة أهل بيتك، وساعتها بتفتح على نفسك باب لألف مصيبة ومصيبة وخناقات مع ناس ماتعرفش يعني إيه أصول ولا احترام لحرمة العائلات.

محتاجين نقف وقفة مع نفسنا ومع المجتمع

لازم نعرف ان الرجولة أخلاق مش استقواء الوقفة على الناصية ومعاكسة بنات الناس عمرها ما كانت، ولا هتبقى رجولة. دي قلة أدب وانعدام للتربية والمسؤولية.

فين الأسرة؟ التربية بتبدأ من البيت اللي بيسيب ابنه يتسكع في الشوارع ويأذي الناس، هو شريك في الجريمة دي. علموا ولادكم إن بنات الناس مش فرجة، وإن الشارع ليه حرمة

الشارع مش ملكية خاصة للمتسكعين، الشارع حق لكل إنسان إنه يمشي فيه وهو حاسس بالأمان ومطمن على نفسه وعلى أهل بيته. السكوت على الظاهرة دي واعتبارها أمر واقع هو اللي بيدي فرصة للغلط إنه يكبر ويتمادى.

ودي رسالة صريحة لرجال الشرطة البواسل