​
انا حاليا عندي 28 عام وفهاد العمر تعلمت شي حوايج وبغيت نشاركهم معاكم ممكن شي واحد يستافد...
1 : قرا اه ولكن متسناش قرايتك هي لي تخدمك
2 : فالعشرينات تعلم علاش ما قدرتي وميهمش من عند من ولا واش لي غيعلمك شخص زوين ولا خايب مادام غتتعلم وماغتتاذاش واخر حاجة تسول فيها هي الصالير حيت فاش كتوصل اللتلاثينات عاد كتولي خصك تسول على الصالير
3 : وهادي من اهم الحوايج لي تعلمت ومازال عندي فيها مشكل... وهو ال money management
خص يكون عندك توازن بين انك تشري داكشي لي خصك تشري وبين انك تخلي فلوسك فجيبك حيت فالاخر كتبقا فلوس كلشي داير عليها وخصها تبقا فالجيب... واحسن ما ممكن تدير واخا صعيب هو انك تشري غا لي كتشوف راسك محتاج...
4 : سامح راسك وماعمرك ماتكون قاسي على نفسك
5 : الحياة ديما كاتجري وماكتسنى حتى واحد... خليك لاصق فالاكتئاب وخليك منغلق على راسك وشوف شنو غيوقع ليك
6 : واليديك مزيان تعاونهم وتوقف معاهم فاش يحتاجوك... ولكن ديما دير فبالك راه غتوصل لواحد العمر وتلقا راسك تم استنزافك من طرفهم بلاما تحس... داكشي لاش شوية لربي وشوية لعبدو... وشوية ليك تانتا... حيت تيق بيا تعطي لي عطيتي اغلب الوالدين عمرهم غايگرو بداكشي لي درتي على ودهم... وهادشي راجع لبزاف دالحوايج فالمجتمع ديالنا اهمها ماكاينش حب... بنادم عاش ومات وتلقاه عمرو سمع تا كنبغيك من عند واليديه!
7 : عادي تخدم فشركة ولكن عمرك تخلي راسك خدام فشركة... دير اي مشروع وتيق فيه وباذن الله الامور غتمشي معاك حسن من الشركة
8 : قتل ادمانك للإباحية قبل مايقتلك
9 : تحكم فالمشاعر ديالك ولا غتجيبها فراسك
10 : خرج من الكونفورت زون وجرب حوايج اجداد... كتبان ساهلة؟. جربها
عندي واحد صاحبي ماكيعرفش تا يلبس وماكيعرفش تا يتصور بشي بوز زوينة وماكيعرفش تا يهظر مع البنات! 28 عام وباقي عندو هاد المشاكل حيت ختار يبقا فمنطقة الراحة... ديما جرب حوايج جداد واخا ممكن تندم عليهم من بعد حيت من الخطأ يتعلم الحمار هههه غا كنضحك ولكن فعلا جرب حوايج جداد ديما
باقي حوايج اخرين ولكن ماكاين لاش نكثر عليكم وندير فيها انا هو ديكارت ههههه وعادي ممكن تكون مامتافقش مع شي حوايج قلتهم عبر على رايك من حقك كيف بغيتي