Mtlb samajh nahi aa raha kaha se start karu… inn kuch dino me life ne bahut kuch sikha diya.
Sabse bada jhatka tab laga jab maine apni coaching fee gambling me uda di. Uske baad samajh aaya ki ab zero se start karna padega. Isliye maine part-time food delivery ka kaam shuru kiya.
Pehle din ₹297 kamaye… zyada nahi tha, par laga ki haan, thoda thoda karke coaching fee arrange ho jayegi. Iss kaam me maine logon ka real nature dekha. Kuch rich log hote hain jo politely baat karte hain, kabhi help bhi kar dete hain. Par kuch aise bhi hote hain jo ₹1500 ka order karenge, par ek rupiya tip nahi denge—even agar aap unke flat ke gate se room tak delivery kar do.
Middle class log alag hi hote hain… ₹300–₹600 ka order karte hain, par ₹5, ₹10, kabhi ₹20 tip de dete hain. Dil se dete hain.
Aur kuch log aise milte hain jinke behaviour ka koi level hi nahi hota… na respect, na understanding. Phir mera accident ho gaya, road condition ki wajah se… aur sabse buri baat, mujhe insurance se koi compensation bhi nahi mila. Sab kuch khud hi handle karna pada.
Aur aaj toh hadd ho gayi… ek chai wala mere parked scooty me aake takkar maar diya, jab main side me khada hoke location check kar raha tha. Upar se mujhse ₹700 maangne laga. Maine mana kiya toh ladne laga, logon ko bula liya.
Majboori me 112 call karna pada. Police aayi, matter solve hua… par fir bhi mujhe ₹200 dena pada. Inn sab cheezon ne ek baat sikha di—paise ki value kya hoti hai. Aur mummy papa kitni mehnat karke kamate hain.
Ab bas ek hi goal hai—coaching fee arrange karni hai aur ye job chhod deni hai. Kyuki sach ye hai ki kab kya ho jaye, koi guarantee nahi hai. Accident ho ya problem… end me sab kuch tumhe hi handle karna padta hai. Kisi ko farak nahi padta tumhari life se. Life ne bohot jaldi reality dikha di.