اعرف صاحبك فالسفر
السلام عليكم،
سافرت قبل كم يوم لاول مره مع اخوياني، واحد منهم اقرب لي اكثر من الثاني، الي اقرب لي صارحته بخصوص موضوع كانوا يطقطقون علي بخصوصه من فترة وانه ينرفزني، ايه طقطقوا علي في الشغلات الثانية عادي، بس الشي ذا وقفوا عنه، صارحته هو لحاله لان توقعت في منه رجاء وانه بيوقف لكن الثانيين ما بيفرقون معاي كثره.
المهم دوبنا تجمعنا في السيارة على اساس موجهين لسفرتنا، ولا الي اعزه يكلم الثاني ويقوله هاه وش رايك؟ نطقطق عليه بخصوص الموضوع ذاك ولا نرحمه، والله لا يوريكم، طاحوا فيني طحن في طحن، طول الخرجة ٣ ايام ما وقفوا.
انا طشمت من اول الخرجه من اول ثانية بس قلت، مالها داعي تنفس عليهم وتخرب الخرجه، مشي الليلة اليوم وبعد الخرجة عاد خفف طلعاتك معاهم، لكن ليتها وقفت على الطقطقة ذي، الخرجه من اولها لاخرها انتقادات، ليش تسوي كذا؟ ليش ما سويت زي كذا؟ والخ والخ.
طبعا انا الي كنت اسوق في الخرجه، فجاءة ليش مهدي؟ واسرع، فجاءة ليش مسرع؟ وأهدي، مره سالني ليش مهدي واسرعت لحضتها يوم كلمني قال لا لا تسرع هنا، يا هوه؟؟؟ ارحمني
وانا اخلاقي قفلت فقاعد اساير سواليفهم واخذ وعطا، لكن شكيت اني قاعد اسال اساله هبله ومعرف اسولف من كثر من اني مطشم، لان ردودهم فيها استهزاء، كنت مقتنع المشكلة فيني، انا بطبعيتي انسى لكن في سؤالين متذكرها من الخرجه كاملة لكل واحد منهم ايقنت انه المشكلة مو مني.
القريب مني قلت له رجعنا البيت عشان نصلي ونرتب امورنا ونشوف وين نوجه بعدها؟ قال لي ليش نرجع البيت، ابله انت؟ يوم جا الثاني قال يالله رجعنا البيت نرتب امورنا ونشوف بعدها وين نروح، ومافي اي ردة فعل منه.
الثاني سالته قلت له وش اسم المكان الي نحن فيه؟ سكت ابو ٥ ثواني، وقال مع ضحك باستهزاء "والله ما ادري انت وش تبي بسؤالك ذا بس اسمها كذا"
ايقنت انه مو المشكلة في اسالتي انها غبية عشاني مطنقر، ايقنت انه في شي غلط، وش هو؟ ما ادري.
يعني هذا الي قصده عمر بن الخطاب رضي الله عنه يوم سال الصحابي الثاني الي كان يشهد لواحد بالخير "هل صحبته في السفر؟"
صراحة جدا مصدوم لان الي بيني وبينهم عشرة عمر من يوم انولدنا.