حظي سيء ولا أنا فاشل عاطفياً؟
خشيت في علاقتين حب قبل كدا ..الاولى كنا كويسين مع بعض وقريبين من بعض وانا ما كنت مقصر معاها عاطفياً يعني مشبعها حنان وبسمع منها طوالي و اي حاجة وبعرف لمن تكون مضايقة وبحاول اطلها من زعلها ومن ضيقها المهم بعدها بي فترة بدأت تعاملني بطريقة بايخة نوعاً او شكلها حست اني مضمون بالنسبة ليها وانا كنت بقدم وهي ممكن عادي سؤال ما تسأل مني او لو كنت ماري بي ظرف عيان او غيرو ممكن عادي ما ترجع تسألني منو وتعمل حركات كدا (يعني كان مافي تقدير )بعدها خلاص قنعت من الموضوع ومن اول ما بديت أعاملها بي نفس طريقتها قالت لي عايزة نحسم الموضوع دا قلت ليها مع السلامة واي زول مشى وحاولت معاي تاني لكن خلاص أنا قفلت كنت
التانية : كانت بعد فترة وانا اساساً كنت شلت موضوع حب وارتباط وكلام فارغ زي دا من راسي لكن دي ظهرت في حياتي فجاءة وكنت بلمح ليها انو أنا ما عايز ادخل في برنامج حب وعلاقة وبتاع وكنا مسمى اصحاب في البداية بعدها شوية شوية التواصل زاد وبقينا بشكل يومي بنتكلم قربت مني وقربت منها وكانت بتعاملني بطريقة تخلي الواحد يحبها غصباً عنو وحسيت انو العلاقة الاولى ديك كانت كلام فارغ بس وهي كانت بتلمح لي وبتقول انت احسن وأظرف والطف شخص عرفته في حياتي وبتاع وانا برضو شايف انو هي كويسة شديد بس كنت متماسك لكن بعد فترة كشحتها ليها قلت ليها أنا بحبك وهي طوالي اتفاعلت معاي وقالت لي أنا برضو وكنا ماشين كويسين شديد وأحلى علاقة بين اتنين بعدها لمن بقيت جد متعلق بيها (وببين ليها مشاعري بالكامل وأنو هي احسن منها ماف وكنا بنمر بي مشاكل زي اي اتنين وكنت بعتذر طوالي وبراضيها وبحل المشكلة وبصلح من الحاجة البتخليها تضايق او بتزعلها ولمن تعمل حاجة تزعلني ممكن اخت ليها عذر من عندي او أناقشها لكن ما بتمسك وبحاول نتجاوز الموضوع سريع مع انو الطبع دا ما فيني لكن عشان كنت بحبها بالجد مستعد أتنازل ) بعد دا قامت تعمل نفس حركات البنت الفاتت نفس السيناريوهات بنعاد قدامي تعامل ببرود عدم تقدير شديد فبقيت مستاء شديد وبسأل نفسي
أنا عارف البرنامج دا كلو اساساً حرام وما صاح وتبت زاتو من الأمور دي لكن داير اعرف هل أنا بتصرف خطأ ولا بعامل بمحبة اكتر من اللازم لانو أنا ما بعرف أعامل شخص بحبو بطريقة بايخة ولا اللي عرفتهم ديل نموذج سيء.