اليوم دخلت ٢٩ سنه، تعالوا اعلمكم اشياء قاسيه وموجعه سويتها بحياتي بس فادتني ونقلتني من طبقة متواضعة لما فوق الطبقة المتوسطة وقريبا بفتح شركتي الخاصة
تعديل....... بحذف الحساب لأن البيئة هنا كأنهم اقاربي الي يشككون ويتهمون عالعموم كتبت هالمنشور تحفيز لأي أحد يمر بمرحله انه يختار قرارات قاسيه عشان مستقبله. احب اقولكم لو النجاح سهل كان الكل ناجح بس النجاح صعب صعب ويحتاج راس يابس وهالشيء مو موجود ب ٩٩.٩٩% من الناس عشان كذا بتكونون وحيدين بالرحله وبتكون صعبه وموحشه بس النتايج بتغسل قلوبكم
والنجاح لمن يجرؤ فقط، الباقين تلحفوا وانسدحوا وطاقعو لين تخلص اعماركم
اول شي بالعلاقات، حطيت قائمة بالناس الي بمحيطي ويشتركون بالكسل والفشل والتحطيم وماعندهم طموح ( قاعدة اذا جلست من ٥ أثرياء انت سادسهم، وإذا جلست من ٤ فاشلين انت خامسهم) وحطيت عليهم اكسسسسسس، ومنهم ٢ اصدقاء مقربين لدرجة كنا شبه يومي نطلع بالساعات ونسافر بس انهم فاشلين لذلك قطعتهم وكان جدا صعب وبعدها بفترة اشتقت لهم وهم حاولوا يستعطفوني بس ما رخضت لان ما وراهم الا ضياع الوقت والتحطيم والحلطمة والفشل
الشي الثاني الي سويته، حذفت كل كل كل السوشل ميديا وخليت التعلم والشغل اولويه رقم ١ بحياتي فوق اهلي وكل شي بالحياه الا اكيد لو كان شي ضروري، جلست ٦ شهور اشتغل على نفسي ٩٨ ساعه بالاسبوع بمعدل ١٤ ساعه يوميا من ٤ الفجر لين ٦ المغرب، درست فيها لغة انقليزيه وانتقلت من شخص مايعرف يكتب جمله وحده صح الى درجة ٨ بالايلتس، تعلمت البرمجة من الصفر للاحتراف وبعت ٤ مشاريع بأكثر من ٦٠ الف ريال، تعلمت الأسهم وكل شي يخص المال والاداره الماليه، حصلت على ٦ شهادات بمجالات مابين التقنيه والمالية وسوقت لنفسي بلنكد ان وبنهاية ال٦ أشهر حصلت على وظيفة براتب ١٦ الف وهي اول وظيفه لي، طبعا خلال هال٦ شهور ما قابلت احد الا يمكن ٣ او ٤ مرات وكلها نص ساعه وخلاص والناس بدأوا يكرهوني بس مستقبلي اهم من مجاملتهم لان مارح يساعدوني
الشي الثالث بعد الوظيفة، ما اصرف الا على الاساسيات والضروريات وبس ، ما اروح مطاعم ولا قهاوي ولا سينما وماعندي اشتراكات ، اسوي كل شي بالبيت من اكل وملابس ونظافة وكل شي، الفلوس الباقيه ضاربت فيها بالأسهم( بحكم دراستي الدقيقه والمتعمقه لها فتره ال٦ شهور) ونجحت الحمدلله، وزيادة على الدوام كملت شغل فريلانسر للمواضيع التقنيه ابيع خدماتي على الشركات بعشرات الالاف، طبعا الصعوبه هنا ان الراتب عالي وكل الناس متوقعين اني ادلعهم وارفهم واحقق أحلامهم بس هالشيء ماصار وتم وصفي بالبخل مع اني فهمتهم اني اخطط على اشياء مستقبليه وهي اولويتي اني احققها ومع ذلك زعلانين ويضايقوني بشكل مستمر ومارسوا علي كل انواع التلاعب عشان ارضخ وما رضخت
طبعا بعد ٥ سنوات من هذي العقليه والعمل المستمر الحمدلله انتقلت لمستوى مادي آخر تماما وكل الناس الي كانوا كارهيني وناقدين صاروا مشجعين وفخورين (بدري)
الأشياء الي حققتها:
شريت بيت اكبر وأفضل لأهلي
شريت سيارتين فخمه لأهلي
شريت ارض لي بحي راقي
شريت لنفسي سياره عليها الكلام
سافرت مرتين بطياره خاصه مستأجره وعشت الفخامه
شريت ساعه للوالد وطقم الماس وذهب للوالده
والحين صرت اقدر اروح مطاعم وقهاوي واسافر والبس واكشخ وانا بالي مرتاح لان كل الأشياء الي خططت لها تحققت بفضل الله
كل القسوه والتعب والألم والقهر الي عشته أثناء هذي الرحله صح اني ما نسيته بس كل ما اشوف النتيجه الحين اقول لنفسي عادي لو ارجع واسوي نفس الشي وزياده بعد والحمدلله اني ما خذلت نفسي واستسلمت للفشل والكسل