بعد 6 سنين دراسة طب عام... شهادة الطب بلا قيمة... أقصى طموحي هسه ألكه شغل عمالة
صارلي سنة متخرج من كلية الطب بالعراق، ولحد هسه لا تعيين ولا شغل.
دورت بكل محافظتي، حتى بالمستشفيات الأهلية، أغلبهم ما يقبلون خريجين أو يريدون واحد عنده واسطة وخبرة ببلاش. حتى الشغل العادي دورت عليه، كاشير و عامل خدمة بمطعم وعمالة وغيرها، وما حصلت. مشكلة حتى ما عندي سيارة علمود اشتغل تكسي .
حرفياً ما أعرف شنو قيمة شهادة الطب هسه إذا صاحبها قاعد بالبيت وحتى جاي ينسى اللي درسه خلال هاي ال 6 سنين.
والمشكلة مو بس هاي، عندي مريض سرطان بالبيت، وأهلي متقاعدين وعايشين إيجار، واني الجبير اللي كلهم كانوا متأملين بي يتخرج ويغير وضعهم.
تالي وصلت مرحلة أقصى طموحي ألكه أي شغل حتى لو عمالة مع احترامي لليشتغلها، بس لا أكو فرصة ولا أكو طريق واضح.
حتى فكرة الهجرة والمعادلة طلعت مو سهلة، وتحتاج فلوس وخبرة وسنين إضافية من العمر ما امتلكها، واني أصلاً دا أضيع يوم بعد يوم.
أحس الطب بالعراق صار وعد كاذب لجيل كامل.