u/EntranceQuiet2014

انا طالب طب سنة سادسة ، طالب سكن بجامعة التكنو و ساكن لحالي و اهلي بالكويت ، من لما اجيت ع اربد بسنة اولى فصل اول كان كله تمام ، بسنة ثانية بلشت تصيبني اعراض نفسيه غريبه يمكن بسبب المسؤولية ، يعني اتأكد من الغاز كذا مره، اتأكد من باب البيت كذا مره ، الموضوع بلش يزيد معي ، بطلت امارس انشطتي اليوميه ، اكثر اشي تطور هو موضوع النظافه ، بسنة ثانية الوضع صار لا يحتمل و قررت اراجع دكتور نفسي بدون ما اخبر اهلي ، تشخصت بsevere OCD و bipolar ، صرت اوخذ ادوية و وضعي تحسن ، قبل كل هاذ ، بأول يوم من سنة اولى تعرفت ع شب هو سوري طالب سكن زيي ، مع الايام تطورت صحبتنا و صرنا نيجي ع بعض عالسكن و نقعد و نروح و نجي ، و ما بنسى فضل هالانسان بتحسين حالتي النفسيه و انا اعتبر انه انقذني من اني اخسر عقلي ، رغم انه هو ما بيعرف اني بروح ع دكتور اصلا بس بيعرف عن بعض عاداتي و بيفكرني بس هيك انسان موسوس و بقرف كثير ، هالانسان بحبه من كل قلبي و بشوفه اخوي بما اني وحيد اهلي و حتى اهلي بيعرفوه ، علاقتنا صارت اخوه و حتى الحواجز بين الاخوة مش موجودة بيننا ، ببداية سنة سادسة صابتني انتكاسة ، و رجع وضعي زاد ، رجعت اراجع عند الدكتور اكثر و زادلي الجرعات ، حسيت مرات اني بعمل تصرفات غريبة ، و بعد 5 دقايق او اكثر بشوي بستوعب اللي صار و بندم ندم شديد ، يعني مش اني غير واعي بس زي يلي بتصيبني عصبية شديدة و بتكون سريعه ، يعني بكون رايق و بضحك قبل بدقيقه و فجأه عند تصرف صغير و تافه بتلاقوني عصبت ، ف صاحبي اجاني عالسكن و كنا قاعدين و بنضح، ف عمل تصرف جدا بسيط عصبني ، و صرخت عليه و سبيت عليه و مديت ايدي عليه لدرجة هو انصدم و ما دافع عن حاله رغم انه جسمه اقوى من جسمي ، و طردته برا البيت ، من يومها و مهو براضي يكلمني ابد ، رحت عنده عالسكن و ما كان بده يدخلني بس دخلت غصبا عنه ، اعتذرت منه و اقسم بالله ترجيته ترجايه عشان يحزن علي و مو راضي ، هو ما بيعرف اني بوخذ ادوية ، فكرت اصارحه و اقله بس خفت اندم بعدين انه حدا يعرف هالسر عني ، يجماعه انا ترجيته اقسم بالله بست ايده و حاول يمنعني ، و على شوي كنت رح ابوس رجله ، مش عارف شو اسوي حاس وضعي ساء و مزاجي معكر خرب كلشي بيننا بسبب مرضي الزفت ، ببكي زي الطفل رغم انه عمري 23 ، اقسم بالله ما نمت مبارح رغم انه هالادوية بتعمللي نوم زيادة مع هيك ما نمت بفكر فيه و انا كيف زعلت بني ادم بيحبني و بيعزني ، شو اسوي و الله ندمان و صحتي النفسيه تدمرت ، لا تقولولي انسى و اقطع علاقتي معه ، ما بقدر ، بيكفي ما عندي اخوه يسندوني و حتى اصحابي قليلين و كل الدنيا ما بتساوي ظفر هالبني ادم بالنسبه الي و كل هاذ و اهلي ما بيعرفوا ولا اشي ، ممكن لو يئست اكتفي عالاقل بأنه يسامحني ، و اذا ما بده يرجع يحكي معي و هاذ الاشي يلي بريحو ف مثل ما بده بس المهم يسامحني