u/Dry_Cantaloupe_9476

فيني حالة رغبة في الكلام مع غرباء. او حالة رغبة في التعبير عن نفسي او البوح بكل ما بداخلي. وعلى الرغم انه احب اهلي وصحباتي لكن برضو احس انه اريح احكي لغرباء اشياء ما اقدر احكيها بأريحية مع المقربين لي. مع انها ممكن تكون اشياء تافهة. انا انسانة احتاج اتكلم وادردش. والمقربين ليا اما فيه احراج بيني وبينهم او مش فاضين ليا دايما او انه بكل بساطة ما ابا اثقل عليهم ومستحيل اتكلم معهم اربعة وعشرين ساعة. حاليا ابا ارغي بس ابا ارغي. عشان كدا فتحت ريديت. المهم انا مرة ما احب اكلم شباب. يعني قد اتكلمت معهم في مواقع التواصل لكن مرة ما ارتاح واحس بتأنيب ضمير وكلهم قلت لهم ما نقدر نكمل نتكلم. الحمد لله دحين ما اكلم ولا شاب. ومش حابة اكلم احد منهم لأنه يأثر على سلامي الداخلي. شعور جدا صعب انه ضميري مو راضي علي واني ما بأعيش وفق قيمي ومبادئي. احب اكون صداقات مع بنات. واعتبرهم اخواتي. بس احس صعب تجي بنت اون لاين مهتمة انها تكون صداقة مع بنت. بس مؤخرا لقيت بنت هنا في ريديت وشبكنا مع بعض! شيء جميل. الله يديم الصداقة والأخوة يارب. ما احب الناس اللي تشوف انه عيلتها بس المهمة والناس التانين تنبذهم او ما تقدرهم. بالنسبة لي انا امي الله يرحمها اتوفت قريب وعائلتي مفككة فلازم استثمر في صداقاتي واقربهم يسيروا اخواتي. انا في قلبي اعتبر صحباتي اهلي. طبعا عندي اقارب واحبهم وكل شيء بس قصدي انه ما احتكر المحبة والقرب عبر الدم فقط. فيه بنت اتعرفت عليها من نادي كتاب وبنقرأ كتاب مع بعض. هيا خلصته قبلي ما شاء الله عليها وانا لسا بطيئة لأني بأعاني مع القراءة من فترة ومريت بصدمة وفاة ماما الله يرحمها والفترة الصعبة بعد وفاتها من تعامل مع ظروف الحياة المادية. البنت لطيفة وكل شيء بس بالنهاية بترد كلمة وغطاها يمكن بتصرفني ههههه البنت تحب الانمي زيي وما شاء الله متابعة كتير وكان نفسي نتكلم اكتر عن الأنمي ونتشارك الشغف تجاهه ونناقش. عملنا كدا شوية بس بعدين حسيت في برود في المحادثة. المهم بس احتجت ابوح. شكرا لكم على وقتكم وعلى قراءة بوستي.