السلام عليكم.
الاكك ثرواواي عشان اقدر اسأل السؤال دا بالذات.
انا الحمدلله مسلم ( مولود مسلم) عشان دي هتفرق جامد في القصة دي كلها.
انا للاسف مكنتش اللي هو المسلم اللي هو بحق ، كنت بذنب كتير و كنت منقطع عن الصلاة و عندك حاجات تانية كتير ( ما عدا الكبائر الحمدلله بعيد عنها) . و اه عارف ان كتير بيذنب و لكن لازم اتكلم عن نفسي عشان الموضوع دا.
المهم ، الحمدلله ربنا هداني و ابتعدت عن معظم الذنوب اللي كنت بعملها و رجعت بتنظم في صلاتي و و و.
المشكلة بتبدأ من اخر يناير ٢٠٢٦. كنت بقي وقت ما ابتديت انتظم في الصلاة من تاني ، المشكلة ان بيجيلي هواجس و تخيلات بشعة جدا و سيناريوهات كلها بتأدي لنقطة واحدة اللي هي شرك. انا هحكي كل اللي بحس بيه و بشوفه، الفكرة انا لموضوع مرتبط بالنصرانية، الهواجس اللي بتجيلي دي بتجيلي علي شكل تخيل للصور اللي النصاري افتروها علي المسيح عيسى عليه السلام ( اللي المفروض اليسوع عندهم ). المشكلة بقي ان الصور دي بتترد عليا بشكل بشع في كل حاجة دينية بعملها من اول ما انتظمت علي الصلاة من تاني.
الموضوع اختفي في رمضان الحمدلله و لكن بعد رمضان ، الهاجس دا رجع اشد من الاول بكتير، التخيل للصور بتاعتهم دي زادت عندي جدا حتي و انا بصلي او بدعي و الي اخره.
انا من يوم الموضوع دا و انا الشهادة مش بتسيب لساني و بقعد ادعي و ادعي و اصلي و اقرا قرآن و ببقي حاطط في دماغي الله الواحد الاحد و ببقي مركز بشدة عشان اقدر اصارع التخيلات دي.
كل شوية بقيت بشوف الهاجس دا بحس بضيق شديد في صدري و بحس ان صدري هينفجر من الموضوع دا. انا بقيت مرعوب جدا اني بسبب الفكرة دي اقع في شرك عن غير قصدي او رغبتي. و خايف اشد الخوف من كدة.
و بقالي من فترة اسبوعين بستمع لمناظرات الاديان لمعاذ عليان و زين خير الله، بارك الله فيهم، عشان اقدر اطمئن نفسي ان الحوار اللي انا فيه دا مجرد وسوسة و اني علي دين الحق و انهم علي الباطل. و الحمدلله انا مقتنع كل الاقتناع ،حتي من قبل ما اتفرج عليهم ،من غير ذرة شك ان النصارى في ضلال شديد. و حاولت اقنع نفسي اني علي الصح و مش محتاج تحاسب نفسك كدة ، ولكن انا مش قادر اسمح لنفسي اني محاسبش نفسي علي موضوع شديد زي كدة. الموضوع كله مش في فكرة النصرانية بس، الفكرة في ان صورهم لعيسى عليه السلام بتيجي في وشي . يعني لا فكرة آب ولا فكرة روح قدس بتيجي في الهاجس دا. و حتي مش فكرة الابن كمان.
و اللي بتعجب منه، ان الابتلاء دا نزل في عقيدتي، يعني ابتلاء في اشد الخطورة و انا بصارع و بجاهد فيه اشد جهاد. و لكن انا نفسيتي تعبت ووكل ما افتكر الموضوع دا اتخنق خنقة شديدة موت لدرجة انها بتجيبلي وجع في جسمي حقيقي.
انا نفسيتي تعبت جدا و لكن مع ذلك مستمر ، بس انا جبت اقصى قدرتي و بحاول علي قد ما اقدر مقعش في اي حاجة غلط.
و وصف اخير للتخيل دا . انا مش بتخيل شغل اللي عو الثالوث و ٣ في ١ و الكلام دا. انا التخيل بس بيجي علي الصور اللي افتروها علي سيدنا عيسى عليه السلام . و انا الحمدلله موحد بالله و ربنا يرزقني الثبات ضد الوسوسة دي. و لما ببقي مركز جدا ببقي عارف ان الله هو الاله الواحد الاحد و مش محتاجة اي دليل تاني.
و مش اللي هو اي ، الصور بتاعتهم دي تبقي هي اللي عملت اللي الله بيعمله. لا، هي مجرد الصورة الحقيرة دي بتحاول تتعدي علي ايماني و تبدل مكانها بالله. و معاذ الله ، الحمدلله انا مقاوم القرف دا و عارف الحق من الباطل و مش مخلي الشيطان او الوسوسة دي تحقق هدفها مني.
انا عايز اتخلص من القرف اللي انا فيه دا.
والله العظيم و اشهد الله علي ان المشكلة دي مشكلة حقيقية و مش مجرد قصة عبثية غرضها شر.
انا مش داخل في دماغي مواضيع اللي هي الارتداد و الكلام دا من اساسه لاني مقتنع كل الاقتناع اني علي الحق ، و لكن انا بخاف من اني اشرك عن غير عمد بسبب الوسوسة دي.
و اخيرا, اشهد ان لا اله الا الله و اشهد ان محمدا رسول الله و اشهد ان عيسي عبد الله و رسوله و كلمته القاها في مريم و روح منه.
ايديت : انا مش بتعامل مع نصارى خالص غير كلمة و رد غطاها ، عشان لو حد خطر في دماغه انب من كتر ما اتعاملت معاهم دا بقي حالي. انا الموضوع دا كله نبع مني لوحده كدة. و عايز اتخلص منه بأي طريقة ممكنة.