يعني يخلو قوات الود قبة تحوم في العاصمة وهي لابسة كاكي الجنجويد عادي؟ هو البرهان دا ما نصيح؟ انت رجعت النور قبة وسكتنا لكن ليه اصلا يكون في ملامح عسكرية في منطقة امنة؟؟؟؟ انا والله ما قادر افهم البرهان بفكر في شنو ولا قادر ابرر ليه او اعذره وانا عارف انو ما غبي للدرجة دي لكن البلد دي هاملة، بعد دا خلي حميدتي يسلم ومعاه كل القيادات وخلوهم يرجعو احبابنا زي زمان ولا كيف؟
(رأي شخصي)
الشرير في الكرتون او اي شي بنشوفه للترفيه بيكون غالبا شخصية هشة كتابيا عايز يدمر العالم او عايز يسيطر عليه، في مرات بيكون منطقي اكتر زي انه داير يسرق او ينتقم من زول او جماعة من الناس، ومرات بيكون الشر اعمق من كدا زي في braking bad او better call Saul، جيمي ووالتر اول حلقات كانو شخصيات عادية زينا، حصلت ليهم سلسلة من الاحداث خلتهم يبقو زي ما بقو عليه في النهاية والاتنين اسبابهم قريبه لبعض لكن دا ما موضوعنا.
انا شايف انه الشر هو الطبيعية الانسانية، والخير اما ارضاء للناس او يعود عليك بي فايدة اقلاها ثناء، اذا الانسان ختوه في مكان مافيه اي عواقب على افعاله حنشوف ناس تتفنن في عمل ابشع الاشياء، ليه اشتغل اذا بقدر اسرق والسرقة اسهل؟ فلان مستفز؟ اقتله وارتاح، وغيرها من الأمثلة، اذا العالم الما فيه قواعد دا أتوجد حيكون مافي قيمة للاخلاق الحميدة، اذا ناضلت انت عشان اكون الشخص الطيب ماف زول حيقول صاح كلامه والله ما صاح البنعمل فيه دا، بل بالعكس حتكون هدف ليهم لانهم حيشوفوك احسن منهم.
لكن في الواقع اذا تطبق العالم دا، انت كقارئ هل حتتمسك بقيمة الجيدة ولا حترضخ للامر الواقع وتبقى كعب برضو؟ واذا بقيت كعب لانه ما بيدك هل العذر دا بيخليك طيب حتى وانت بتقتل وتسرق؟
طبعا دا عالم سريالي ما بتقدر تتنبأ بي قواعدة وقوانينه حتكون كيف، لكن اذا جينا للواقع شنو البيخلي انسان يبقى قاتل او مغتصب او "شرير" بشكل عام في عالم فيه قانون وعقاب؟ هل بيئته وظروفه الاتربى بيها؟ او خلل نفسي فيه خلاه يعادي المجتمع؟ السلوك العدواني يورث ولا ما ليه علاقة بي جيناتك؟
لو شفتو اكتر الدول المنتشرة فيها الجريمة حتلقو انها الدول الفقيرة، الفقر بيخلي الانسان الغير سوي يتخلى عن مبادئه ويتجه للعنف والعدوان عشان يعيش، مع انه ما مبرر لكن لو جينا لنوع تاني، مثلا جيفري ابستين، عاش حياة اكتر ما يقال عنها عادية ومتوسطة مافيها احداث تخلينا نقول انه الزول دا مضطرب، لكن في حالته بنرجع للنوع الاول، ابستين مثال حي على الشر الممكن يوصله الانسان اذا امن العقاب وغيره كتير من الاغنياء واصحاب النفوذ الماف زول حيحاسبهم في الدنيا بيحتقرو النفس البشرية عشان شهواتهم، واغلبنا لو كان مكان ابستين حيسوي زيه او اكعب منه، ما بالضرورة نفس افعاله لكن بغض النظر عن الحيسويه حيكون ممثل لرغبات الانسان الخالصة بدون النظر للضرر الحينتج منها للناس التانيين.