u/Adorable_Juice9039

ما ادري عندي مشكلة من اكون گاعدة ويه مجموعة اشخاص اول ساعة اكون بكامل طاقتي الاجتماعية بس بعدين ابدي امل وانعس ويصير عندي خمول وانسحب من المحادثات، المشكلة مو هنا المشكلة يعني ويه صديقاتي لو اخواتي او اي شخص احبه اني طبيعية ما اتغير بس من اگعد ويه غير اشخاص اتكأب ومن نطلع مثلًا لاحد او شي ابدي احسب شوكت نرجع للبيت مع انو قبلها اكون كلش متحمسة وهذا الشي لاحظته من زمان يعني من واني صغيرة هيج واحس عاااا محد عنده حل اريد اخلص من هاي المشكلة😭!!

هاي فد مرة من چنت بالسادس ابتدائي المدرسة سوت النا سفره مدرسية ف چانت عندي صديقة نسميها زبيب ف زبيب واني كلش تحمسنا علمود السفرة، المهم ف اجه يوم السفرة وكشخنا اني وزبيبة ورحنا للمطعم ووراها بدينا نلعب ف شنو گالتلي خل نعوف المدرسة ونظل هنا وبعدين نرجع تكسي(گالتها بصيغة شقه) ف شنو چانت اكو بنية واكفة يمنا وسمعت زبيبة ف وراها گاموا يصيحون اسماء المدارس الي لازم ترجع من مدينة الالعاب ف شنو اني وصديقتي زبيبة طرشات ما سمعنا وظلت المديرة تنتظرنا وصاحوا الاسماء بالمذياع مدري شسمه المهم ف تتذكرون هاي البنية الي سمعت زبيبة؟ راحت للمديرة وفتنت علينا، بوكتها اني وزبيبة العينتين اني چنت بموقف الانتظار مال الالعاب وهي جانت بالحمام تعدل شكلها، اني بوكتها جنت مو محجبة ف ما احسلك الا واحد جرني من شعريي بقوووة ادير وجهي الگاها المعاونة گالتلي ولج انتِ شنو تريدين تفضحينا واني مفاهمة السالفة😭😭😭 انوب وراها كملت عليه المديره وضربتني همين وضربت زبيبة راجدي معدل من هذا اليسطر(طلعت المديرة عبالها نريد نعوفهم ونروح بكيفنا) المهمم شبعنا دگ رزايل ومن چنت بالباص چان نفسه الي بيه المعاونه ف دگتني بالرزايل واني بس ابجي و رجعت للبيت ومن الفشلة ما گلت لاحد وگتلهم السفرة جانت تجننن وهيَ حرفيًا طلعت من خشمي😭😭

المهم ومن رجعنا للدوام المديرة اعتذرت مني واني اخخخخ فد چنت اكرهها 🥀 وبعدها مُباشرة تحجبت لان صارت عندي تروما انو احد يجر شعري واني ما ادري🥀😭

هاي ليش عود

عود ليش هاي

ليش هاي عود

ليش عود هاي

عود هاي ليش

اها=اغار🤬

اممم=احبك😍

وينك=مشتاقين😔

براحتك=لتروح😢

شهر مايو يُعتبر من اشهر التوعية بالصحة النفسية، تقريبًا كل سنة ٨٠٠ الف شخص ينهون حياتهم، يعني كل ٤٠ ثانية شخص واحد، وحوالي ٢٥ بالمية من الاشخاص يعانون من المشاكل النفسية

ف لهذا السبب ياعزيزي ويا عزيزتي ممكن كلمه وحده منك تغير مجرى حياة شخص ثاني، اذا صادفتوا شخص يفكر هيچ حاولوا تحتووه وتقدموله الدعم

اما اذا چنت انتَ او انتِ هو الشخص الي محتاج المُساعدة، فكلامي الكم...

اول شي الانتحار يعتبر تهرب من المشكلة مو حل، مهما عانيت بحياتك الانتحار مو الحل الاساسي للمشكلة، وحتى لو ارتكبت خطأ او حادث اثر بصحتك النفسية راجع دكتور ولا تفكر تنهي حياتك، اني اريد منكم انو تموتون موته سليمة ومراح اگول بعيد الشر لان كلنا نموت ومحد ضامن عمره،، بس مع ذلك حاول تعيش حياة حلوة حاول تعيش كل لحظة بحياتك سواء چانت مُحزنة او مُفرحة لان ماكو احد حياته مثالية بالكامل، ولا اكو احد حياته حزينة بالكامل.. حاول تخلي ببالك انو انتَ راح تموت بعد ما قدمت كلشي لحياتك بدون تقصير، كون آخر منظر تشوفه بحياتك هوَ دموع الناس عليك، القصد هنا مو علمود نظرة الناس وانما دموعهم راح تكون من حبهم الك شخصيًا، كون بعد كم سنة تتذكر لحظاتك الصعبة وتبتسم لان انتَ صبرت عليها، واذا عندك شخص تثق بيه بحياتك تگدر تصارحه عن مشكلتك لان يمكن يكون هوَ الشخص الي يغير مجرى حياتك، واذا ما عندك هيچ شخص عندك رب العالمين القادر على كل شيء

وانتَ انسان بالنهاية ميحتاج تنهي حياتك بطريقة مأساوية علمود ظرف صعب، تذكر الظروف الصعبة هيَ الي تقويك وتبني شخصيتك، واذا چان علمود غلط فتذكر انو الغلط المفروض تتعلم منه وعادي جدًا توگع بيه لان بالنهاية انتَ انسان ومو معصوم من الغلط🌷

كلامي ملخبط نوعًا ما لان كتبته بدون تحظير مُسبق ما عدا اول ٣ اسطر👌🏻 ولكن مع ذلك حبيت احچي عن الموضوع🌷

​

من نشتاق لشخص معين، نشتاق اله شخصيًا او لذكرياته الي صنعها؟

الذكريات تشكل رابط حلو ونفسي بالحياة، ممكن تكون ذكرياتنا حلوة، او مرّة، او الاثنين

بس السؤال هنا، شنو عامل الذكريات من نشتاق، هل تخلينا نشتاق للشخص اكثر، او بس نشتاق للموقف الي صارت بيه الذكرى؟ اذا چان هالشي حقيقي يعني احنا ما نشتاق للشخص نفسه، وانما لذكرياته

بس

بنفس الوقت اذا اجانا شخص ثاني وصنع نفس الذكريات ما اتوقع ممكن نشوفه نفس الاول، يعني هسة الشخص صار اهم من الذكريات؟ لو الذكريات فقدت طعمها وصار مرّ لان احنا مجربيها قبل؟

ما ادري شكتبت المفروض هاي الاسئلة تجيني بعد مُنتصف الليل بس اليوم اجت من وكت شكلها😂.

دائمًا من اهلي يريدون يطلعون امي تگولي المن طالعة ويانا ابقي بالبيت وهواي تكرر الموضوع تقريبًا بأي طلعه امي تظل تگول هيج اني اگوللها ليش متريديني اطلع تگولي ما عندج ملابس وما ادري شنو من هاي الاعذار مع العلم عندي هواي هدوم طلعة، حتى تخرج اختي ما خلوني اروح وابسط شي مثلًا بيت جدو بالعيد كلهم راحوا وعافوني اني واختي بحجة والله محد بالبيت(مع العلم بيت جدو يبعد عنا مسافة ١٠ دقايق مشي ونگدر نقفل الباب ونروح كلنا) وحتى بعرس خالي گالتلي شنو تردين تروحين گلت الها ليش ما اروح ترا خالي، وبيوم العرس تكشخت واول مرة احس نفسي حلوة بس تعرضت للتنمر وصراحة للان ندمانه لان رحت، ومثلًا من يجونا گرايبنا ويگولون اي شموسة متطلع امي گبل تگول اي هية ما تحب تطلع ويانا مع العلم اني اتمنى اطلع ويه اهلي واحس بالاجواء العائلية، تقريبًا بس مرتين طالعة وياهم...

وهمين ابسط شي اليوم،، طبعًا امي وابوية جانوا رايحين للنجف ف اجو اليوم وهمين اجت خالتي ف شنو خالتي ظلت تتنمر عليه بعدني ما مسلمه عليها استلمتني اي شضعفج وشنو هاي واسمني واني ظليت صافنة انوب وراها بشوية رجعت وسألتني گدام الكل انتِ ليش هلگد ضعيفة يعني زيادة عن اللزوم، اني تمنيت لو الگاع تخسفني وحسيت بوكتها شلون الخنجر دخل بگلبي كلمتها هواي اثرت بيه وامي ظلت تگوللها اي من الدراسة وما ادري شنو وتنطيها اعذار يعني المفروض تسكتها مو تگعد هيج تبرر

احسها هواي تتفشل مني لان اني ما اعرف احجي ويه الگرايب

للمعلومية علاقتي وياها زينة واحبها بس اتمنى لو تفهمني شوية، واسفة عالكلام الطويل بس ما عندي احد اگوله وحاليًا داخلة مرحلة الانهيار من ورا خالتي كلما اشوفها تلعب روحي