أنا كنت عايش ومستقر في السعودية مع أهلي، ونزلت مصر الفترة دي عشان أستقر بسبب الجامعة.
هناك كنت متعود على نمط حياة معين:
بصلي دايمًا في المسجد، بحضر مجالس ذكر وقرآن، وكنت ملتزم شوية.
مطول لحيتي، لبسي غالبًا ثوب، طاقية، وأحيانًا شال أو شماغ، ومعايا سواك… وده كله كان طبيعي جدًا هناك ومحدش بيبصلي بشكل غريب.
وفي نفس الوقت كنت بلبس عادي برضه (بنطلون وتيشرت أو قميص).
نزلت مصر على أساس إن ده عادي، لكن اتفاجئت إن الوضع مختلف جدًا:
- لو مطول لحيتي بحس إن فيه قلق حواليا
- لو لابس ثوب، طاقية، شماغ أو شال، بحس الناس بتبصلي باستغراب
- حتى لو لبسي عادي ومعايا سواك، بلاقي نظرات
- لما أبقى مع صحابي (كورة أو بلايستيشن أو حتى لو قاعدين)، صعب أوقف عشان الصلاة
- ناس بتقولي: "إنت هتستشيخ علينا؟"
- حسيت إن فيه فرق كبير في الجو العام واللبس حواليا، وده خلاني أحس إني مختلف ومش مرتاح… وأسأل الله أن يثبتني.
وده كله وأنا اللي مش عاجب وغريب.
والنهارده حصل موقف غريب وضايقني جدًا:
نزلت أصلي وكنت لابس ثوب وطاقية ومعايا السواك عشان متعود على كده. كان فيه اتنين شباب واقفين في طريق الجامع، وشكلهم بيدوروا على مشاكل. كانوا بيتكلموا عليّ وأنا داخل، فتجاهلتهم ودخلت صليت.
بعد ما خلصت، وأنا راجع البيت وبقول أذكار، قابلتهم تاني في نفس المكان وباين حتى إنهم مصلوش. فضلوا يتكلموا عليّ، وأنا كملت طريقي وساكت. فجأة واحد فيهم شتمني والتاني بيضحك. بصيت أتأكد لو يقصدوني، لقيتهم باصينلي وبيشتموا فعلًا، فكملت ومردّتش.
افتكرت ساعتها الآية:
﴿وَعِبادُ الرَّحمنِ الَّذينَ يَمشونَ عَلَى الأَرضِ هَونًا وَإِذا خاطَبَهُمُ الجاهِلونَ قالوا سَلامًا﴾
أنا متضايق جدًا ومحروق دمي، وحاسس إني مش مرتاح خالص هنا.
لدرجة إني بفكر أرجع السعودية.
هل ده طبيعي في مصر؟ ولا أنا بس اللي مش متأقلم؟