غلطة عايز اشنق نفسي بسببها
اول مرة اشير حاجة هنا، بس حقيقي دماغي هتموتني من كتر التفكير. و اتمنى اللي يقرأ ميهزقنيش، انا استاهل، بس عملت دا كتير لحد ما مبقيتش حاسس بحاجة.
الموضوع باختصار اني مرتبط ببنت و بنحب بعض جدًا و علاقتنا لطيفة و خدنا اول خطوة جد، و بنجهز لخطوبة ان شاء الله. و الدنيا بينا طبيعية و مريحة الحمد لله. و حتى سكشوالي، متوافقين و بيحصل حاجات بسيطة من حين لاخر. و كمان كنا متفقين اننا نتقابل و يمكن يحصل حاجة. بس الظروف فضلت تعاكسنا، و كان بقالنا كتير شويتين فا على اخري.
لحد كدا كله كويس. اللي مش كويس بقى، اني انزل النهاردة أروح شغلي عادي، و اتفاجئ بالإكس اللي اذتني و فشختلي حياتي و خانتني و ترتب علي دا اني سبتها و كرهتها. الاقيها في وشي. واقفة جنب عربيتي و بتقولي عايزاني في حاجة مهمة.. مكانش مني غير اني فتحتلها و ركبت، و فضلت تهرتل بكلام مش مفهوم بس بتقول وحشتها. انا عرفتها ان في حياتي حد و استأذنتها تنزل، و طلبت مني اوصلها لمكان تلاقي فيه مواصلات عشان مسافة شوية بين البيت و بين اقرب مكان فيه مواصلات.
المهم ان في الطريق بدأت تستهبل و ترمي لمسات ملهاش لازمة، و بغبائي ضعفت و بادلتها اللمسات دي و حصل حاجة مكانتش المفروض تحصل. هي اه حاجة عبيطة، بس ستظل اسمها خيانة. مكانش المفروض دا يحصل اطلاقًا، و بعد ما نزلتها فضلت اهزقني طول الطريق و طول اليوم مش عارف اتكلم مع خطيبتي، حاسس اني مخبي عليها حاجة و مكسوف من نفسي و قرفان مني.
و دلوقتي بقالي 3 ساعات بحاول أنام مش عارف. ملقيتش غير اني انزل بوست هنا يمكن حد يعرف يقولي حاجة تهدي الاحساس دا شوية. انا بنهار و حاسس إني لازم أقولها اللي حصل، بس لو قلتلها هتسيبني، و انا ما صدقت لقيتها. خايف أكون ضيعتها بسبب اللي عملته دا.